Тужгес устоосыз гала-концертэ пыриськозы

«Мудорвай» улоскуспо вожвылъяськонлэн гала-концертъёсаз быръён этапъёс ортчизы. 

Асьме ёросын со котьку сямен куинь нунал ӵоже ортчиз но куинь зонаын радъяськиз: Ципья, Ӟаны но Покчи Лӧзя гуртъёсын. Отчы мыло-кыдо пыриськизы шоръёзо школаосысь покчи классъёсын дышетскисьёс но нылпи садын визьнод басьтӥсь пиналъёс. Нылпиос туэ но учкисьёсты но жюрилэсь членъёссэ чебер кырӟанъёсынызы но кылбуръёсынызы, шулдыр эктонъёсынызы но яркыт дӥськутъёсынызы шумпоттӥзы.

Сяме пыремъя, та вожвылъяськонэ мукет выжы калыкъёс но пыриськизы: бигеръёс но, ӟучъёс но, поръёс но. Соос но удмурт кылын кылбуръёс лыдӟизы, кырӟанъёс кырӟазы, эктонъёсмес эктӥзы. 

Удмурт калыклэсь лулчеберетсэ но сям-йылолъёссэ возьматӥсь устооссэ творческой номеръёсты Балтась лулчеберетъя центрын ортчем гала-концертын 14-тӥ шуркынмонэ адӟыны луоз. Ужрад 18.00 часэн кутскоз.

Тодэ вайытон вылысь: конкурслэн валтӥсь ужпумъёсыз — Татарстанын улӥсь удмуртъёслэсь лулчеберетсэс но сям-йылолъёссэс утьыны юрттон, озьы ик нылпи садэ ветлӥсь но покчиёзо школаын дышетскись пиналъёсты удмуртъёслэн лулчеберетэнызы но кылэнызы тунсыкъяськытон; дышетон юртъёсысь педагогикая составез, анай-атайёсты но конкурсэз дасян но улонэ пыӵатон уже кыскон.