Удмурт, бигер, ӟуч но пор — пӧртэм калыкъёслэн бадӟым семьязы

Вылын Ушма гуртысь Ишмурзинъёс «Эхо веков в истории семьи — Тарихта без эзлебез» ӵыжы-выжы луонлы сӥзем элькун вожвылъяськонлэн муниципал этапаз вормисе потӥзы но оштолэзе Атня ёросын ортчоно зона этапын Балтась ёрослэсь данзэ утёзы шуыса ивортӥмы вал ини. Туннэ статьяямы та семьяен матынгес тодматском.

Бурбаш лулчеберетъя юртлэн вӧл-вӧл фойеяз соос калык сиён-юонъёслэсь, киужъёслэсь но вашкала арбериослэсь узыр но чебер адӟытон радъязы. Жюрилэсь ёзчиоссэ Ишмурзинъёслэн семьязы но ӵыжы-выжыоссы вашкалаоссылэсь куэм выждэразэс вӧлдыса ик пумитазы. Кырӟаса-вераса, соос мадизы асьсэ выжызы сярысь, кудӥз 17-тӥ даурысен тодмо вылэм ини. Куноосты Ишмурзинъёс удмурт калык сиён-юонъёсын тодматӥзы, веразы, кызьы соосты дасяно но мыло-кыдо куноязы. Удмурт ӝӧк вылын вал тужгес тодмо калык сиёнъёс но юонъёс: пельнянь, кӧжы кисаль, мильым, картофкалэсь но губилэсь перепеч, табань, шунянь, шешери, йӧлпыд но трос мукетыз. 

Конкурслэн кыкетӥ люкетэз ортчиз сцена вылын, отын но соос туж умой выступить каризы. 

Ишмурзинъёслэн выжыязы музъем ужасьёс, муш вордӥсьёс, корзина керттонъя кибашлыос, куиськонъя усточиос луиллям. Озьы ик соослэн дано ӵыжы-выжыоссы луо кыкетӥ рангысь капитан Павлов Андрей Петрович, врач-кардиолог, Казаньысь медициная университетысь доцент, эмтодосъя кандидат Ишмурзин Геннадий Петрович но гурт удысысь дано ужась Ишмурзин Пётр Александрович. Пӧлазы вань нимысьтыз ожгар операция мынон интыын шаермес утисьёс но. 

Та выжылэн эшшо одӥг валтӥсь тодметэз — трос йӧскалыкъем луон. Выжыязы, удмуртъёс сяна, вань бигеръёс, поръёс но ӟучъёс. Озьыен, та семья калыкъёс куспын тупаса, ог-огдэ гажаса но эшъяськыса улонлэн зэмос примерез луэ.

— Семьямы трос кыло: ми ӵошен пусйиськом Акашкаез но Ымусьтонэз, Сабантуез но Ураза-байрамез. Со праздникъёс, сям-йылолъёс улонмес аспӧртэмлыко шӧмъёсын но ог-огмес гажанэн узырмыто, — выжыосыз сярысь данъяськыса вераз Марина Ишмурзина.

— Ми понна улон — со вис карытэк ялан азьлань мынон. Огсыр ужан нуналъёсмес вошто семья пӧлын шуныт мылкыдын ортчем ӝытъёс. Ми ӵошен пӧртэм киужъёсын выриськом, конкурсъёсы пыриськиськом, вормонъёсмылы шумпотӥськом. Праздникъёсы пӧраськиськом: пыжиськом но чеберъяськом тортъёс — та ческыт шедевръёслэн туспуктэмъёссы утисько семьялэн альбомаз. Песянайёсмылэсь кылем вашкала сямъёсъя пуэн эстоно гурын табань пыжиськом но матысь адямиосмылы паймымон чебер ӝӧкъёс дасяськом, соосты кунояськом. 

Милям асьмелэн муш бакчамы но асьмелэн чечымы вань. Бакчамес утялтӥськом, турын дасяськом но урожай люкаськом — котькуд сезон ужазинлыклэсь емышъёссэ вае но поколениосты огазея. 

Ми асьме музъем вылын гинэ ум ужаське, вордскем гуртмы сярысь но сюлмаськиськом: субботникъёс ортчытъяськом, ошмесъёсты но ӵыпетлэсь ярдуръёссэ жуг-жаглэсь сузяськом, писпуос мерттӥськом но макулатура люкаськом. Та мерлыко уж кылкутонлы дышетэ, инкуазез гажан мылкыд пыӵатэ но калыклы пайда ваемез шӧдыны луонлык кылдытэ. Та ужъёс куспын пӧртэм интыосы ветлонлы дыр но шедьтӥськом, — семьяезлэн улон радлыкеныз тодматӥз Марина Владимировна.

13-тӥ оштолэзе Атня ёросын ортчыны кулэ вожвылъяськонлэн зона этапез, кытын Ишмурзинъёс Балтась ёрослэсь данзэ утёзы. Соослы Зеленодольск, Верхний Услон, Кайбицы, Апас, Буинск, Дрожжановск но Высокой Гора ёросъёсысь семьяосын вожвылъяськоно луоз. Азинсконъёс соослы!

P. S.: нимысьтыз таукылъёс вераны кулэ та конкурсэз кичӧлтӥсь Татарстан Республикаысь Архив ужъя кун комитетлы но солэн кивалтӥсезлы Гульнара Габдрахмановалы. Та конкурслы луыса туннэ нуналэ адямиос данэ потэм выжыоссы сярысь вераны, ӟеч ужъёссэс республикамылы возьматыны, туала поколенилы улон сямынызы адӟем карымон луыны но вуоноезлы пайдаё наследие кельтыны быгато. Радъясьёс трос йӧслыко Татарстанлэсь йӧскалык дунлыкъёссэ утён, калыкъёслэсь тупаса улэмзэс возьматон понна трос кужымзэс сёто но конкурсэз арысь аре эшшо но ӟечгес карыны тыршо.