«Удмурт Кенешлы» – 25 ар

Удмуртъёслэн но соослэсь бере кылемзы ӧз поты: кызьы удмурт калыкмес быронлэсь утёно, кыӵе амалъёсын кылэз но лулчеберетэз азинтоно. Кылдылӥзы лулчеберетмес, кылмес утён вылысь пӧртэм огазеяськонъёс, ортчылӥзы кенешонъёс. Удмурт азьветлӥсьёс одӥгаз кенешазы вань удмуртъёслэсь съездзэс ортчытон сярысь ӵектонэн потӥзы. Но республикаысь кивалтон эшелонын таӵе ужрадлы, удмурт движенилы пумитъяськисьёс но вал. Тау шуыны кулэ Удмурт Республикаысь соку Вылӥ Кенешлэн кивалтӥсезлы В.К.Тубыловлы, ваньзэ интыяз пуктӥз. Озьы Совето Союзысь удмуртъёслэн нырысетӥ ӧтчамзы Ижевскын 1991-тӥ арын 22-тӥ - 23-тӥ шуркынмонэ ортчиз. Дуннелэн пӧртэм сэрегъёсысьтыз кужмоесь делегациос вуизы. Асьме районысь ньыль муртъем делегация вал: Кунаев А.М. - «Азьлане» газетлэн редакторез, Байтуганов П.В. - Покчи Лӧзя школалэн директорез, Никитин В.П. - Карек-Серма школаысь дышетӥсь но Ермаков И.В. - Ӟаны школалэн директорез. Бадӟым докладэн потӥз К.А.Пономарёв - профессор, история наукаосъя доктор. Озьы ик удмурт калыкмылэн ортчеменыз тодматӥз М.В.Гришкина - профессор, история наукаосъя доктор. Та мур пуштросъем докладъёс пумысен трос делегатъёс вераськизы на. Соос, сюлэмзы вӧсь луыса, куддыр вожпотэмзэс возьматыса, кудӥз каньылэн удмурт кыллэн быремез, калык сям-йылолъёслэн вунэмзы сярысь вераськизы, кивалтон ужъёсы удмуртъёслэн пыриськымтэзы но школаосын удмурт кылэз дышетымтэзы сярысь кылпум ӝутӥзы. Ӟырдыт вераськиз «Дэмен» огазеяськонлэн кивалтӥсез, философияя тодосчи А.А.Разин. Мыным тужгес кельшиз удмурт дӥсен дӥсяськем финн нылкышно тодосчилэн Мария Картанолэн удмурт кылын сокем вольыт но шонер ужпумъёс ӝутыса вераськемез. Вераны кулэ, Мария Картано Библиез удмурт кылэ берыктӥсьёслэн одӥгез. Съездэ мукет странаосысь общественной ужен вырисьёс но лыктэмын вал: Прибалтикаысь, Венгриысь, Финляндиысь. Съездлэн делегатъёсыз «Удмурт Республикалэн кун суверенитетэз сярысь декларациезлы» но Россие пырись аслаз правоосыныз элькун кылдытон пала дурбасьтӥзы.

Нырысетӥ ӧтчам «Удмурт Кенеш» политикаен но общественной ужен вырись огазеяськон (ассоциация) кылдытонэн йылпумъяськиз. Тӧрое быръемын вал профессор, экономика наукаосъя доктор Михаил Иванович Шишкин. Ассоциацилэн уставезъя удмуртъёслэн азинсконэнызы герӟаськем законъёслэсь проектъёссэс дасяны, политикая, экономикая, лулчеберетъя, калыкез дышетонъя ужпумъёсты сэрттыны-пертчыны кулэ. Съездъёс куспын ужан понна, пӧртэм ёросъёсысь удмуртъёсын кусып возён понна, Пичи кенеш кылдытэмын вал. Асьме ёросысен отчы В.П.Никитинэз ӵектӥзы.

Съезд туж зол радъямын вал. Делегатъёслэсь со удмуртлык понна нюръяськон мылкыдъёссэс уката ӝутӥз. Ми, районысьтымы делегатъёс, озьы ик ӝутскем мылкыдын бертӥм. Соку ик ӝабырским ёросамы удмурт культурая общество (УКО) кылдытон борды. Вераны кулэ, вылӥ кивалтӥсьёсмы милемлы дурбасьтӥзы. Съездэз дасянэ трос кужымзэ понӥз Г.С.Мухамметшин - со дырысь ёрос администрацилэн тӧроезлэн кивоштӥсез. Малпанмы быдэсмиз. 29-тӥ тулыспалэ (феврале) 1992-тӥ арын Удмурт культурая общество кылдытон съезд радъяськиз. Мыным оскемын вал нырысетӥ бадӟым докладэз дасяны но лыдӟыны. Съездлэн ужаз 150 пала делегатъёс но куноос пыриськизы, соос пӧлын ик Улисьялысь мари делегация. Правленилы 15 член бырйиськиз, соос пӧлысь дасэз - дышетон удысын тыршисьёс. Кивалтӥсе бырйимы А.М.Кунаевез.

Озьыен, 25 ар тырме ни асьме районын но Удмурт культурая обществолэн (2000-тӥ арысен НКА «Кенеш») кылдэмезлы. Малпасько, сӥё-дано пусъём та юбилеймес районын тупаса улӥсь, юн тыршись вань калыкъёсын. Йылпумъяса гожтэме потэ соку дыре районлэн кивалтӥсезлэсь (али Татарстанысь премьер-министрлэн воштӥсез) Марат Готович Ахметовлэсь удмуртъёслэн II-тӥ съездазы верам кылъёссэ: «Асьме удмуртъёс экономикалэн, улонлэн «уробояз» пуксьыса гинэ уг мыно, бигеръёсын но мукет калыкъёсын ӵошен вань кужыменызы со «уробоез» кыско, районлэн экономикаяз бадӟым люкет пырто».

Василий НИКИТИН
Карек-Серма гурт