«Удмурт сямен яратӥсько...»

Ципья шоръёзо школаямы сяме пыремын 27 шуркынмонэ Удмурт кыллэсь нуналзэ «Удмурт сямен яратӥсько...» нимын пусйыны. Переменаосын 1-11 классъёсысь дышетскисьёс кылбур вераны, кырӟаны, эктыны быгатэмзэс возьмато. 

Туэ но «Удмурт сямен яратӥсько кылбур вераны» люкетаз пыриськизы Исаев Эмиль (2 класс), Якимова Вероника но Филиппова Эльза (3 класс). «Удмурт сямен яратӥсько кырӟаны» люкетэз туж быгатыса быдэстӥзы 4 классысь нылъёс но 11 классысь Тукаева Юлия. «Удмурт сямен яратӥсько эктыны» люкетаз задор мылкыдын пыриськизы 1 классысь но 10-11 классъёсысь нылъёс.

Та нуналмес усьтӥз Удмурт кыллэн нуналэзлы сӥзем открыткаосын адӟытон. Котькуд классысь открыткаос огезлэсь огез чебересь вал.

Та нуналлы сӥзьыса, дышетӥсьёс, дышетскисьёс но школаын ужасьёс пӧлын ортчытэмын вал «Удмурт кыл мон понна...» акция. Куд-ог «емышъёсын» тодматэме потэ. 

Нылпиос пӧлын таӵе верамъёс ӵемгес пумисько:
— мон понна со анай-атайлэн кылыз. Мон соосты туж яратӥсько, куспамы вераськон кылмес но озьы ик яратӥсько.
— со кыл, кудзэ мон туж яратӥсько, со кылын мон вераськисько семьяям.
— мон удмурт кылэз туж яратӥсько, шуген вераськисько ке но. Но бадӟым будӥ ке, одно ик верасько.
— мынам улонам со самой нырысетӥез кыл, со улонлэн одӥгез валтӥсь люкетэз.
— яратоноез кыл, солэсь возьдаськоно ӧвӧл. Мон тодӥсько, удмурт кылмес кунгож сьӧрын но дышето шуыса.

Дышетӥсьёс пӧлын таӵе валэктонъёс:
— анай кыл, со асьмелэн ог люкетмы. Котькытын луи ке но, котькинэн вераськи ке но, удмурт кыл котьку мынам, со монэн артэ.
— со семьяен, ӵыжы-выжыосын герӟет.
— дуно, мусо но чебер кыл. Мон малпаськисько, вераськисько удмурт кылын.
— мон понна со вордскем кыл. Со туж дуно но мусо. Туж шумпотӥсько, мынам нылпиосы удмурт кылын верасько шуыса. Оскисько, нунокъёсы но вераськозы шуыса.

29 шуркынмонэ пыриськимы на калык творчествоя «Калык гурез утчаса» II-тӥ Улосвылкуспо этнофестивале, кудӥз ортчиз Кукмор ёросысь Шор Кумор шоръёзо школаын. 10-11 классъёсысь нылъёслэн «Чеберай» ансамбльзы (кивалтӥсез Чернова И. А.) но 1 классысь нылъёс (кивалтӥсьёссы Трокова О. А. но Ермолаева Т. А.) 1-тӥ интыосын бертӥзы. Быгатонлыкъёссэс возьматӥзы «Калык эктон» номинациын.

Чернова Ираида Анатольевна,
Ципья шоръёзо школаысь
удмурт кылъя но литературая дышетӥсь.