Удмуртлыкмес вылӥе ӝутыса  

Тани шуом, чылкыт-чебер удмурт кылмы но вуныса мынэ кадь. Азьло дырын пичи пиналлэн нырысетӥ кылыз «анай» кыл луоз вал, нош туннэ нуналэ «мама» шуыса вазё ини. Шонер-а со, ӧвӧл-а — сое тодӥсь-валасез ӧвӧл, дыр, но одӥгез туж тодмо: уз, уз вуны асьмелэн кылмы, куке вань на удмурт кылмес дунъяны но данъяны тыршисьёс. Соос пӧлысь огез Пётр Васильевич Байтуганов луэ. Кемалась ӧвӧл 80 арес тырмем юбилееныз ӟечкыласько сое. Юн тазалык, шуд, корка пушкады тынӥсьлык, вань малпанъёсты мед быдэсмозы, котькуд вордӥськем нунал умойзэ гинэ мед кузьмалоз Тӥледлы, Пётр Васильевич.

Ужан сюресэз Пётр Васильевичлэн Вукогурт музъемысен кутскем, луоз. Школамы нюк дорынгес вал, одӥг липет улын, коридор вал, собере «избач». Вот отын ужаз Пётр Васильевич. Со дырын библиотека малы дыр ӧз шуылэ, «избач» шуизы. Небыт но лякыт сюлэмо пияшез гурт калык соку ик яратӥз, пиналъёсты капчи но каньыл мылкыдын пумиталляз. Куд-ог дыръя удмурт книгаослэсь пуштроссэс тыршиз пиналъёслы валэктыны, соин ик но, дыр, «избачын» мӧзмон ӧй вал, калык шумпотыса ветлӥз шутэтскыны, вераськыны, пинал куараосты кылыны, выль иворъёсын тодматскыны, озьы ик кырӟаса но пукылӥзы.

Дано калык артист Геннадий Кузнецов аслаз удмурт калыкез юн яратӥсь сюлмыныз, трос аръёс ӵоже Ижкарысь «Айкай» ансамбльын пӧртэм интыосы вуыса, удмурт калыкез данъя, тырше дано карыны. «Айкай» ансамбль туж чебер концерт возьматӥз Москваысь Кремлёвской дворецын. Калык капчи мылкыдын шумпотыса пумитаз соосты. Нош кыӵе капчи эктӥз, отын ик кырӟаса но гармошкаен но шудыса паймытӥз Геннадий Кузнецов! Со асьме ёросын будэм пияш, соин ик бадӟым тау удмурт калыкез ӝутэмды понна.

Озьы ик Пётр Данилов тырше удмурт дӥсьёсты ас киыныз вурыса калыклы возьматыны. Солэн со дэра куэмез гинэ но, юнгес ке малпад, туж бадӟым уж луэ. Азьланяз но озьы ик ас киыныд вурем но чеберъям дӥсьёсыд мед шумпоттозы улонэз яратӥсь, удмуртлыкмес гажась калыкъёсты.

Ёросысь удмуртъёслэсь ужзэс тырше возьматыны ӟырдыт но пӧсь сюлэмо, удмурт калыкез юн яратӥсь Леонид Сапожников. Юнгес ке малпад, со огшоры гинэ уг лыкты — ваньзэ улонысь басьтыса, тодыса-валаса калыклэн сюлэмаз но юн мед пыӵалоз, асьме ёросын но вань сыӵе дано муртъёс шуыса. Ваньмыз понна туж бадӟым тау кылме вераме потэ.

«Азьлане» газет пыр, шуыны луэ, тодматски Починка гуртысь Зоя Никитиналэн калык понна ӟеч ужъёсыныз. Гуртын улыса, калыкез гажан мылкыдыныз со трос ужъёс лэсьтэ удмурт калыкез дуно но дано карон понна. Со доры трос интыосысь вуыло удмурт дӥсь вурытон понна. Озьы ик но улоно но тыршоно, дыр, со та югыт дуннеын, ас калыктэ гажано, удмуртлыкмес вылӥе ӝутыса!

Мария Александрова

Башкортостан