Улоскуспо фестивальёслэн синмаськытӥсь кужымзы

Карлыганын но Вятские Поляныын ортчись ужрадъёсын калыкмы кемалась тодмо ини. Бускель музъемын улӥсь аспалъёсмы котьку шумпотыса лыкто шуныт крезьгуръёсты кылзыны но задор эктонъёсты учкыны.

Лӥятӥсь сӥзьыллэн шунытэз копак кошкиз, лэся, ини. Сое воштӥзы кезьыт нуналъёс, кынтылонъёс, ӵужектэм куаръёс но зоръёс. Таӵе куазен мылкыд но куашка, киос но ужъёслы уг кыстӥсько. Но ӝутскем мылкыдын улӥсь адямиос котькыӵе югдурысь умой палъёссэ гинэ шедьтыны тыршо. Рос-прос дасям ужрадъёс сое зэмато гинэ. Удмуртъёслэн аспӧртэмлыко шунытэсь пумиськон интыоссы мӧйыосты гинэ уг кыско, татчы егитъёс но пырисько, пичиос но шумпотыса возьмало та ужрадъёсты.

11 коньывуонэ сяме пыремъя Мари-Турек ёросысь Карлыган гуртын «Выль нянь сиён» улоскуспо фестиваль ортчиз. Куатетӥ арзэ пор музъемысь удмурт лулчеберетлэн центраз трос гинэ коллективъёс люкасько. Балтась но Кукмор ёросъёсысь, Киров улосвылысь удмуртъёс шумпотыса вуо татчы, люкисько быгатонлыкъёсынызы, соин валче асьсэлы трос гинэ тодон-валанъёс но басьто. Вачепайдаё ужрад мылкыдтэм вакытэ но улонэ кӧня ке яркыт буёлъёс пыртэ.

Фестиваль зэмзэ но туж узыр луиз. Аспӧртэмлыко эктонъёс но кырӟанъёс быдэс залэз улӟытӥзы кадь. Лыктэмъёс но мылкыдъёссэс ватытэк, артистъёсты кичабонъёсын данъетазы.

— Котьку шумпотыса лыктӥськом татчы. Концерт понна гинэ ӧвӧл, татын аспӧртэмлыко атмосфера луэ. Ваньзы шулдыр мылкыдэн, ӟеч малпанъёсын ог-огзэс пумитало, верасько. Ас вордскем гуртад кадь лыктӥськод. Огшоры адями ке но, тонэ котьку туж вылӥе пукто. Лыктэмед ӧз поты ке но, выльысь лыктод. Таӵе ужрадъёс тросгес мед луозы вал, — мылкыдзэс усьтӥзы учкисьёс.

Котькуд лыктэм коллектив но нимаз артист нимысьтыз диплом но синпель кузьым басьтӥз. 

Шундылэн берпуметӥ шунтӥсь сиосыз выллем та фестиваль но лыктӥсьёслэн сюлэмъёсазы шуныт пыртӥз. Кезьыт тол азьын та туж пайдаё фестиваль луиз. Азьланяз но та йылол аслэсьтыз дунлыксэ уз ышты, вуоно аре эшшо но тросгес коллективъёс люкаськозы шуыса оскисько.

Кыкетӥез бадӟым ужрад ӟучарнялы тупаз. Киров улосвылысь Вятские Поляныын нош ик та коллективъёс ик пумиськизы «Аран быдтон» праздникез ортчытыны.

Праздниклэн кузёез — удмурт калык «Чипчирган» коллектив — котькуд лыктӥсь коллективез сиён-юонэн но кырӟан-эктонъёсын пумитаз. Ӵукнаысен татын аспӧртэмлыко адӟытон но вӧлмиз, сӥзьыл «узырлыкен» но калык сиён-юонэн тырмытэм ӝӧкъёс туж узыр адӟиськизы. Лыктэм куноос но калык сиёнэз веръяны, калык кухнялэсь секретъёссэ тодыны быгатӥзы.

Валтӥсь ужрад ини сцена вылын мынӥз. Ог-огзэс вошъяса коллективъёс туж усто номеръёс возьматӥзы. Тунсыко дӥськутъёс, действиослы тупась атрибутъёс калык гуръёсты эшшо но узыртӥзы. 

Озьы ик пыриськисьёс нимысьтыз дипломъёсын но кузьымъёсын пусъемын вал. Коллективъёс капчи мылкыдын вордскем палъёсазы берытскизы. 

Та ужрадлэн но гумырез кузь мед луоз на. Удмурт лулчеберетлэсь чеберлыксэ но узырлыксэ шараяса, мукет калыкъёслы тунсыкъяськон мылкыд мед пыӵатоз. 

Бускельёсмылэн ужрадъёслы рос-прос дасяськемзы но сюлворемзы туж паймытэ. Котькуд коллективлы саклык висъяса пумитамзы, келямзы тросэз сярысь малпаськытэ. Куддыр адямилэн учкемез, одӥг кыл верамез но сюлэмез вӧсь карыны быгатэ яке яраосты бурмытэ. Та учыре асьмелы соослэсь дышетскыны кулэ. Сюлме пыӵась, тодэ кылись ужрадъёсты ортчытыны быгатыны кулэ. Азьланяз но калыкъёслэн эшъяськыны быгатэмзы секыт югдуръёсты вормыны кужым мед сётоз. Огазе луыса, матысь дыре улонамы сыӵе ик шулдыр но сайкыт вакыт мед вуоз!