Ум вунэтэ анай кылмес

Кыл но калык. Та кылъёс ог-огенызы туж юн герӟаськемын. Котькуд калыклэн вань аслаз вераськон кылыз, вордскем кылыз. Со кылын вераськись ӧз лу ни ке, калык быремен лыдъяськоз. 

Ас кылдэ, ас калыктэ гажан — со адямилэн вань улонэз пыр потыны кулэ, дыр. 

Удмурт кылъя но литературая урокъёсамы пиналъёсын вераськиськом, юан пуктӥськом: «Малы нош вордскем кылэз „анай кыл“ шуо меда? Нош юртмес малы „атай юрт“ шуо?» «Атай корка лэсьтэ», — шуо ӵемысь. Нош анай пинал вордэ, сое уте, сюдэ... Нырысь ик солэсь вераськемзэ кылӥськом...

Озьы ик вань но, дыр. Вордскем кыл — со пичи дырысен анай йӧлын нылпилы пыӵам кыл. Адямилэн вань улонэз анай кылыныз герӟаськемын. Нылпи вераськыны ӧз дышы на, нош со пеляз понэ ини анаезлэсь нуны веттан гурзэ, выжыкыл верамзэ. Озьы будытозяз котырысь улонэн тодматске ас кылыныз. Анай кыл вылын ик юнмало солэн ӟеч сямъёсыз но. Азьланяз вордскем кылыз солы юрттоз мукет кылъёсты но дышетыны. 

Удмурт кыллэн огъя дунневыл нуналэзлы сӥзем ужрадмы ваньместы огазе люказ. Ортчиз со «Ум вунэтэ анай кылмес» ним улсын. Та нуналэ урокъёсамы кылбуръёс лыдӟимы, «Юан-веран» шудонэн шудӥмы, удмуртъёслэн сям-йылолъёссы сярысь кино учкимы. Нош бадӟымез ужрад ортчиз актовой залын. Отчы пыриськизы 1-11 классъёсын дышетскисьёс но школаысьтымы дышетӥсьёс, ужасьёс. 

Пиналъёслы пӧртэм ужъёс дасямы. Тодоно вал удмурт но ӟуч сямен будос, писпу, тылобурдо, сяська нимъёсты. Котькуд уж бере «крезьгуро вис» ортчытӥськиз. Отын возьматӥзы асьсэлэсь быгатэмзэс «пичи артистъёсмы». Нырысь ик сцена вылэ потӥзы 2-тӥ классын дышетскисьёс. «Самовардэ пукты али, ой, уроме...» кырӟанэз быдэстӥзы (кивалтӥсьсы Игнатьева Л. И.). Кылзӥмы Ширинова Севильлэсь «Ноку уз вуны со война» кылбурзэ (авторез Елена Рябина). Та кылбур сӥземын Быдӟым ожын быремъёслы (кивалтӥсез Евдокимова Г. Б.). 4-тӥ классын дышетскисьёс быдэстӥзы «Ми таримес кизимы» кырӟанэз. Нылпиосын ӵош сцена вылэ потӥз классэн кивалтӥсьсы Лидия Аркадьевна. Арганэн шудӥз Камаев Антон. Валерия Чирикова Т. Куртуковалэсь «Матушка-земля» кырӟанзэ удмурт кылын быдэстӥз. Михайлов Арсений арганэн туж усто шудӥз удмурт крезьгуръёсты. 

«Пичи артистъёсмы» пӧлын Виктор Павлович Камаевлэн нунокъёсыз (внукъёсыз): 2 классын дышетскись Андрей, 4 классын тодон-валан басьтӥсь Антон, 6 классысь Валерия. Камаевъёслэсь семьязэс ёросамы гинэ ӧвӧл, артысь улосъёсын но тросэз тодо. Татын удмуртлыкез, калык сям-йылолъёсты туж утё. Ваньмыз со кутске ас вордскем кылдэ тодэмен, ас калыктэ гажан бордысен. Семья куспазы но удмурт кылын верасько. Нош бадӟымез внучкаез, 8-тӥ классын дышетскись Кира Чирикова, удмурт кылъя но литературая Элькун олимпиадалэн ёрос этапаз 2-тӥ арзэ ни призо инты басьтӥз. Озьы ик, та нылпиос, школаысьтымы «Инвожо» фольклор ансамбле мылысь-кыдысь ветло, кудӥныз трос аръёс ӵоже кивалтэ Виктор Павлович. 

Нылпилэн ас вордскем кылзэ гажанэз семья бордысен кутске. Угось нылпи семьяын ас анай-атаезлэсь мар каремзэ, кызьы вераськемзэ адӟыса, кылыса будэ. Озьы ик со но соос сямен лэсьтэ, вераське. 
Котьма но ачиз адями бордын. Кызьы со возе ассэ калык пӧлын, кыӵе кылын со вераське...

Мынам анай-атайёслы вазиськеме потэ: «Нылпиосты медаз вунэтэ ас вордскем кылзэс. Дорады вераське удмурт кылын. «Ас кылзэ вунэтэм адями — йыромем адями», шуэ визькыл. Медаз йыроме вал нылпиосты, мед шедьтозы сюрес вордскем гуртазы, шаеразы, ас калыксы доры.

Ужрадлэн пумаз ваньмы ӵош быдэстӥмы Н. Байтеряковлэн кылбурезъя гожтэм «Вамыштомы артэ» кырӟанэз. 

Тодам лыктӥз, директор луыса ужан вакытаз, Иван Васильевич Ермаковлэн, удмурт кылын ужрадъёс ортчытыкумы, та кырӟанэз школаямы «гимн» интые кырӟаломы шуыса верамез. Со дыре дышетӥсьёс но, дышетскисьёс но тодо вал ни кырӟанлэсь кылъёссэ. Та малпанэз азьпалан быдэстомы шуыса оскисько.

Ужрадмы тунсыко но пайдалыко луиз шуыса малпасько. Азьланяз но тыршомы удмурт кылэз данъяны, гажаны, утьыны, вераськыны. Вордскем кылэз утён — асьмелэн бадӟым ужпуммы. Ум вунэтэ анай кылмес! Ум возьдаське асьме кыллэсь. Котьку но котькытын вераськомы соин.

Петрова Римма Николаевна, Шор Кушкет шоръёзо школаысь удмурт кылъя но литературая дышетӥсь.