Ура, удмурт лагерь!

Гужем, каникулъёс, шундыё нуналъёс, праздникъёс — та ваньмыз нылпиослэн улоназы секыт дышетскон арзэс йылпумъямзы понна аспӧртэмлыко кузьым луэ. Туэ удмурт лулчеберетэн тунсыкъяськись пиналъёслы тужгес но удалтӥз — соос понна Ципья школалэн территорияз удмурт шӧмо лагерь ужаз. Нош бигер пиналъёс понна сыӵе ик лагерьёс Вуж Салаусь но Нуринер гуртъёсын ужазы.

5 нунал ӵоже пиналъёс удмурт калыклэн аспӧртэмлыко но тунсыко дуннеязы омырскизы, со сяна самой валтӥсез — татын соос выль эшъёсты шедьтӥзы, шулдыръяськизы, вераськизы но дырзэс ортчытӥзы. Удмурт калыклэн «Гырон быдтон» праздникез азьын та туж усто эксперимент луиз. Пусйыны кулэ, лагере удмурт нылпиос гинэ ӧз пыриське, соин валтӥсь валатон татын эшъяськон луиз.

Нырысетӥ нуналысеныз ик лагерь аслаз узыр программаеныз паймытӥз. Ципья шоръёзо школаысь дышетӥсьёслы со понна тау карыны кулэ. Вить нунал ӵоже соос нылпиосын трос интыосы вуизы, пӧртэм ужъёсты быдэстӥзы. Нылпиослэн мылкыдъёссыя но валамон луиз: соослы удмурт калыклэн шудонъёсыз но сям-йылолъёсыз тунсыко. 

Котькуд калыклэн историез эшъяськон бордысен кутске. Со понна лагерьын нырысь ик «Ӟечбур», «Ӟеч лу», «дась лу», «котьку дась» шуэм кылтэчетъёсты дышетӥзы. Вожатойёслэн верамзыя, лагерь ужан дыр ӵоже нылпиос та кылъёсын пумиськизы, инъет луись кылъёсты дышетӥзы.

Тодматскон но коллективе умой пыриськон понна нимысьтыз пуштросо шудонъёсын шудӥзы. Собере котькуд команда аслаз отрядэзлы ним но девиз малпаз. Вань официальной люкетъёсыз бере, удмурт кылъя но литературая дышетӥсь Ираида Чернова «Чыртыкыш» мастер-класс ортчытӥз. Татын пиналъёс дышетскизы удмурт калык чеберянёсты лэсьтыны. Бен, вераны кулэ, ваньзылы та уж капчиен ӧз сётӥськы. Ведь киужен вырыны трос чидан но тыршон кулэ. Нош али гинэ каникуллэсь шӧмзэ валаса вуттэм пиналъёслы интыязы пукыны тунсыко ӧвӧл, соослы ялан бызьылоно, тэтчано. Озьы ке но, пӧлазы удмурт чеберъянэз пумаз-йылаз вуттэмъёс луизы.

— Та чыртыкышез али уг тодӥськы кинлы сётыны. Аслым но кельтыны малпасько. Кызьы, мае интыяно вожатойёс валэктӥзы. Нырысьсэ таӵе уж борды кутски, капчи ӧвӧл. Татын туж малпаськоно, вылэм, тае тани валай мон, — мылкыдъёссэ вераз Киров улосысь Уржум ёросысь Лазарево гуртысь вуэм нылаш Александра Канева. Нылъёсын одӥг радын ужазы пиос но. Кылсярысь, бигер пияш Реналь Гарифзянов (туспуктэмын) азьвыл мылпотытэк кутскиз та уж борды, ваньзэ пыр-поч валэктэмзы бере, мылысь-кыдысьуж борды кутскиз. Пичи пияш понна та бадӟым вормон луиз, дышетӥсьёс но тыршемзэ пусйизы. Озьы ик нылпиос удмурт калык эктонлэн выросъёсыныз но тодматскизы. Валче соос минутъем эктон дышетӥзы. 

Мукет нуналъёс но пӧртэм ужрадъёсын тырмизы. Мастер-классъёсты ортчытӥсьёс, кужымзэс жалятэк, нылпиосты удмурт сям-йылолъёсын тодматӥзы. Татын мызган-баянэн шудон но, зоутъёс но, ӝӧквыл шудонъёс но, экскурсиос но, калык сиён-юонэн тодматскон но вал. 

— Ми понна та нырысетӥ опыт луиз, соин асьмеос но нылпиосын ӵош дышетским, асьмелы но тунсыко потӥз котькуд нуналэз радъяны. Нырысь ми палэнысь лыктэм нылпиосты кутыны малпаськомы вал, собере кылемез ини школаысь ик нылпиосын тырмиз. Ми нокинэ ӧм люке, ваньзэсты огкадь адӟиськом. Вань финансирование республикаысен лыктӥз, вань дӥськутъёс, кулэ луись атрибутика — ваньмыз сётӥське. Дышетӥсьёс но сюлмысь ужазы. Пуштросэзъя та бигер лагерь луыны кулэ вал, но милям школаямы трос йӧскалыко нылпиос дышетско бере, соосты удмурт лулчеберетэн тодматыны малпамы, программамы но туж узыр пӧрмиз. Вань радъясьёслы, мастер-класс ортчытӥсьёслы бадӟым тау шуиськом но азьланяз но ӵошен ужаны мылкыд кариськом, — ивортӥз Ципья шоръёзо школаысь директорлэн визьноданъя воштӥсез Нина Давлекова.

Зэмзэ но, нырысетӥ эксперимент — со котьку кышкыт но кылкутымон уж. Татын нимысьтыз программаез гинэ радъяно ӧвӧл, нырысь ик пиналъёсты тунсыкъяськытоно, малы ке дышетоно. Вить нунал со туж ӧжыт ке но, котькуд луонлыкен дыраз пайдаяськыса кылёно. 

Азьланяз но удмурт лагерьёс мед усьтӥськозы, удмурт кыллэн но калыклэн чеберлыкез мукет калыкъёслэн мерассы пӧлын медаз безды.

Тодады вайытӥськом: 2024 арын нылпиослэн но егитъёслэн «Движение первых» организацизылэн кичӧлтэменыз но бигер кылэз но Республикаын улӥсь калыкъёслэсь анай кылъёссэс утён, азинтон ужпумъёсъя Татарстан Республикалэн Раисэз бордын ужась Комиссилэн тӧроез Марат Готович Ахметов юрттэмен Алькеевск, Апас, Арча, Тюлячи но Балтась ёросъёсын «Ура, авылга!» проект ужаны кутскиз. Кылем арын 15 гуртъёсысь проектэ 700-лэсь трос нылпиос пыриськизы, туэ проектлэн географиез кык поллы паськытаз. Таяз аре татчы 30 гуртъёсысь 2 сюрслэсь уно нылпиос пыриськизы.