«Ужано ке — лулысь-сюлмысь»

Дышетӥсьлэн ужез нуналысь нуналэ кулэ каре мыло-кыдо луэмез, сюлмысь тыршемез, чиданэз но кужымез. Солы котькуд нылпилэсь куронзэ кылзыны но котьмалы ӝог валэктон сётыны дась луоно. Нош тужгес но кулэез — пиналъёсты яратоно. Ӧнер праздниксы азьын самой матысь адямиосылэсь — анаелэсь но сузэрелэсь — интервью басьтыны малпай.

Ирина Евгеньевна но Алеся Леонидовна Жуковаос — ӟуч кылъя но литературая дышетӥсьёс. Анае дышетон удысын 30 арлэсь тросгес тырше ни, сузэре — витетӥ арзэ. Малы соос дышетон удысэз бырйизы, быгато-а соос туала нылпиосын огъя кыл шедьтыны, юртто-а ог-огзылы уж ласянь — та сярысь интервьюез лыдӟыса тододы.

Пичи дырысь малпан но адӟем карымон пример

— Нырысетӥ юанэ тӥледлы, Ирина Евгеньевна. Семьяямы дышетӥсьёс ноку ӧй вал, кадь. Нош тӥ ку но малы та удысэз бырйыны малпады?

Ирина Евгеньевна: Зэмзэ верано ке, мынам пичи дырысеным дышетӥсь луэме потӥз, со мынам льӧль малпанэ вал. Яратоно дышетӥсе Ираида Михайловна шоры учкыса, вань эшъёсылы, матысьёсылы верасько вал, мон но одно ик улонме нылпиосты дышетон удысэн герӟало шуыса. Ираида Михайловналы аслыз но кӧня пол со кылъёсты верай, со пальпотэ гинэ вал. Озьы, школаез йылпумъяса, Казаньысь педагогикая училищее дышетскыны пыри.

Сое горд дипломен быдэстӥ но визьнодасьлэсь ӧнерзэ басьтӥ. Ӝоген ужаны но кутски. Кӧня ке ар нылпи садын тырши, берлогес ини вылӥ тодон-валан басьтӥ но Ципья черкогуртысь школаямы ужаны интыяськи. Нырысь тырши пионервожатой луыса, собере ӟуч кылъя но литературая дышетӥсь луыса ужаны кутски. Со дырысен ужан интыме ӧй вошты ни.

Алеся Леонидовна: Нош мон котьку анае шоры, дышетӥсь шоры кадь, синмаськыса учкисько вал. Кызьы со ассэ дышетскисьёсыныз, ужъюлтошъёсыныз, классысьтыз нылпиосызлэн анай-атайёсыныз возе — ваньмызлы паймисько вал. Аслэсьтыз дырзэ жалятэк, анаймы урокъёс бырем бере но темаез валамтэ нылпиосын нимысьтыз ужаз. Али но со ужысьтыз доре бертыны уг дырты, ачид тодӥськод. Бертӥз ке но, я тетрадьёсты эскерыны кутске, я пӧртэм отчётъёсты гожъяны пуксе.

Со котьку озьы вал. Дышетӥсьлэн ужез туж секыт но кылкутымон шуыса туж умой валай ке но, мон та удысэ вамыштыны чик ӧй кышка. Йошкар-Олаысь педагогикая университетэз йылпумъяй, дышетскыкум ик городысь школаын дышетыны кутски. Нош диплом басьтэме бере, дорам бертӥ но Шишинер гуртысь школае ужаны интыяськи. Анае кадь ик, нылпиосты ӟуч кыллы дышетӥсько.

Нылпиос понна – дышетӥсь но, эш но

— Тӥ кыкнады но дышетӥсьёс, кылчиос. Валамон, куддыръя ог-огеныды уж ласянь кенешиськоды, кулэ луыку ог-огдылы юрттӥськоды, куддыръя споръяськиськоды но. Но кызьы луиз ке но, тӥляд сямъёсты пӧртэмесь. Соин, малпасько, ужады но пӧртэм амалъёсты кутӥськоды, дыр, дышетскисьёсын но асьтэды пӧртэм сямен возиськоды, дыр.

Ирина Евгеньевна: Мон туж паймисько, куке мыным таӵе юан сёто. Малы тросэз адямиос малпало, дышетӥсь нылпиосын ассэ мукетгес сямен возьыны кулэ шуыса? Бен, дышетскисьёсын субординациез чаклано, таин мон соглаш. Но нылпиос — соос ми кадь ик адямиос ук. Соосын ноку но вылтӥяськыса вераськыны уг яра. Куке тон соослы эш, юрттӥсь, визьнодась, куддыръя психолог но луыны быгатӥськод, соку гинэ нылпиос тонэ яратозы но тыныд оскозы. Кыӵе ке умойтэм уж лэсьтӥзы ке но, мон аслэсьтым пиналъёсме тышкаськыны уг дыртӥськы, нырысь соосын вераськисько, ваньзэ кылын валэктыны тыршисько.

Тышкаськонлэн кыӵе пайдаез? Нылпилы валэктыны кулэ ук, со шонер ӧвӧл шуыса. Кызьы луиз ке но, мон аслэсьтым нылпиосме туж яратӥсько, гужем каникулъёс дыръя кыӵе мӧзмисько соослэсь! Сыӵе вакытъёсы телефонысьтым туспуктэмъёссэс учкыса пукылӥсько, соку ини сюлмы буйга.

Алеся Леонидовна: Та юанын мон анаеным соглаш. Мон но нылпиослы эш луыны тыршисько. Зэмзэ верано ке, Шишинерын ужаны кутскыкум, нырысь нылпиослэн мыным «Алеся апай» шуыса вазиськемзы потэ вал. Оло, егит карыса, оло озьы дышемын вал соос. Но мон соосты туж ӝог дышетӥ шонер вазиськыны. Шумпотӥсько, туннэ мон нылпиосы понна — дышетӥсь но, матысь юлтошсы но шуыса. Соос монэ туж умой тодо. Мылкыды куашказ шуыса шӧдӥзы ке, дорам лыктыса ужъёсыным, тазалыкеным тунсыкъясько, ӟыгыръяло.

Одӥгез дышетскисе, Искандар, (туннэ нуналэ со студент ини) али но монэ туж матын каре, аслаз бадӟым апаез интые пуктэ. Кыӵе ке визь-кенеш курыса ӝыт но, шутэтскон нуналъёсы но вазиськыны быгатэ. Нош мон котьку солы дыр висъяны тыршисько. Дышетӥсьлэн ужез школаын гинэ уг быры уго. Ми соосын котьку юн герӟетын, зэмзэ но. Каникулъёс дыръя гинэ но.

Туала нылпиос

— Туала нылпиос туж ик лыдӟиськыны уг ярато. Та ужпумез кызьы сэрттыны-пертчыны луэ?

Ирина Евгеньевна: Мон та малпанэн соглаш уг луиськы. Шонер, ӟуч литератураез, классикаез шумпотыса лыдӟись нылпиосты чиньыен лыдъяны луоз, дыр. Тужгес ик бадӟым объёмен гожтосъёс сярысь верано ке. Но озьы ке но, егитъёс книгаен эшъясько. Кин ке кунгожсьӧр литератураез быръе, кинлы ке фантастика тунсыко потэ, кин ке психологиен герӟаськем книгаосты лыдӟе. Мон ӟуч кылъя но литературая дышетӥсь луисько бере, та сярысь малпаны кутски ке, йыры кур луэ. Но, мукет ласянь учконо ке, телефонъёсазы пукон интые киязы книга куто бере — та шумпотымон ни.

Но ми, дышетӥсьёс, ум сётскиське! Кылсярысь, урокын нылпиос «та гожъяськисез мон уг яратӥськы, вероссэ лыдӟеме уг поты» яке «улонын мыным ӟуч литератураез тодон маин юрттоз?» шуизы ке, мон соосын споръяськыны кутскисько, ӟуч литературамылэсь узырлыксэ, кулэлыксэ, примеръёс вылэ пыкъяськыса, валэктыны тыршисько. Шуыны кулэ, тросаз учыре нылпиослэн малпанъёссы воштӥсько.

Алеся Леонидовна: Ӟуч кылын таӵе умой веран вань: «В споре рождается истина». Мон но, анаймы кадь ик, дышетскисьёсыным споръяськыны яратӥсько. Малы? Нылпиослы аслэсьтыд шонер луэмдэ валэктыны быгатоно. Ӟуч кыллы яке литературалы яратон мылкыд пыӵатон, тодон-валан сётон — мынам валтӥсь ужпуме. Ватытэк верало, бигер гуртысь школаын та ужпумез быдэстыны секытгес ик. Соин мон тыршисько урокъёсме нуналысь нуналэ, арысь аре тунсыкогес но аспӧртэмлыкогес карыны, Нылпиос, асьсэос кулэ карыса, ӟуч литератураен мед тунсыкъяськозы шуыса турттӥсько. Яра али туала дыре ваньзэ Интернет пыр шуак лэсьтыны луэ.

Туала технологиос но ИИ

— Мон тонэ валай, «Искусственный интеллект» амал сярысь вераськод-а? Туала дыре солэн дышетӥсьёслэн ужазы юрттэмез шӧдскымон бадӟым, дыр.

Алеся Леонидовна: Со сярысь гинэ ӧвӧл, но тон шонер вераськод. Мон туж ӵем соин ужам пайдаяськисько. «ИИ» ужмес капчиятэ. Ма, нылпиос но визьмоесь ук али, соос туж кескичесь. Сочинениосты но со система пыр гожъяло. Малпало, мон уг вала шуыса. Бен, мед малпалозы... (серекъя — ред. ). Но мон тазьы шуисько: туала улонлэсь бере кылёно ӧвӧл. Быгато бере — мед дышетскозы, мед утёзы. Соин пайдаяськыны быгатыны кулэ ук али. Валамон ни, эсэпсэ тодыса.

Ирина Евгеньевна: Алеся, нылпиос ӵемысь эсэпсэ уг валало, жаляса верано. Азьтэмъяськыны кутско, капчи гинэ ужпумъёссэс но туала технологиен пайдаяськыса ужало, асьсэ йырынызы малпамысь дугдо. Та шонер ӧвӧл. Соин та туж споръяськымон юан. Ог 10-15 ар талэсь азьло ужам дыръёсме тодам вайисько ке, мӧзмон мылкыдъёсы выйисько. Нокыӵе «ИИ» ӧй вал, ужмы, улонмы трослы каньылгес вал. Мон уг ӝожтӥськиськы, выль технологиослэсь палэнтӥ ортчоно ӧвӧл, соос куддыръя ужамы туж юртто, но солэн кызьы пайдаез, озьы ик изъянэз но вань. 

Урокъёс бере

— Урокъёс бырем бере пиналъёс уг дырто, дыр, доразы?

Ирина Евгеньевна: Озьы ик вань. Огшоры урокъёс вылын гинэ туала школа, туала дышетӥсь азинскыны уг быгаты. Со понна, ӵектосъёс гожъяса, пӧртэм вожвылъяськонъёсы пыриськиськом. Тыршиськом, малпам ужрадъёсмы пиналъёс понна пайдаё но тунсыко мед луозы шуыса. Тэк улыны ум чидаське. Классысьтым котькуд пинал кытын ке но ассэ возьматэ. Дышетсконын ке уг, пӧртэм кружокъёсы, секциосы мыло-кыдо ветлэ.

Мон ачим но шумпотыса пӧртэм конкурсъёсы пыриськисько. Шумпотымон, кивалтэтмы тыршеммес адӟе, туэ гужем гинэ РФ-ысь Просвещениея министерствоысь кема аръёс ӵоже мыло-кыдо ужаме но дышетон удысын азинсконъёсы понна почётной грамота сётӥзы.

Алеся Леонидовна: Мон но классэным мыло-кыдо пӧртэм ужрадъёсы пыриськыны тыршисько. Конференциос, вожвылъяськонъёс, мастер-классъёс... Таӵе ужрадъёсы пыриськыса, трос тунсыкозэ тодыны луэ, выль эшъёс шедё, вуоно ужъёслы мылкыд бурдъяське.

Шуныт кылъёс, ӟеч сӥзёнъёс

— Туннэ ӧнер праздникты — Дышетӥсьлэн нуналыз. Мар сӥзьысалды ӵош ужась эшъёстылы?

Алеся Леонидовна: Юн тазалык, капчи мылкыд, сайкыт малпанъёс сӥзисько. Дышетскисьёс ӟеч тодон-валанъёсынызы мед шумпоттозы, тунсыко ужъёсынызы паймытъяны мед быгатозы. Бадӟымесь вормонъёс но азинсконъёс! Котькуд нунал мар ке выльзэ мед ваёз.

Ирина Евгеньевна: Учырен пайдаяськыса, вань дышетӥсьёсты праздникенымы ӟечкыласько! Котькуддылэн ик улонды, сӥзьыл нюлэс кадь, пӧртэм буёло, чебер, яркыт, синмаськымон мед луоз. Малпанъёсты улонэ капчиен мед пыӵалозы, вӧзады тӥледыз валась, дунъясь муртъёс мед луозы. Юн тазалык но капчи мылкыд! Веранме осконэн йылпумъясько: тыршыса ужаммылэн пайдаез одно ик шӧдӥськоз — со ӟеч сямо, визьмо но яратыны быгатӥсь нылпиосмы.

Вераськиз Наталья Жукова