Вань удмурт егитъёс пӧлын сыӵеосыз но

Туннэ тӥледыз тодматэммы потэ егит пиен, Кисаль (Сала-Кушкет) гуртын улӥсь Денис Яковлевен. Вордӥськиз со 2010 арын Ольга Михайловна но Олег Павлович Яковлевъёслэн семьяязы. Олег Павлович ёросысь калыклы азьмынӥсь механизаторен тодмо луэ, котькуд октон-калтон вакытэ со бусыысь бертыса уг вуы, ас ужезлэн зэмос усточиез луэ. Ольга Михайловна аслаз капчи мылкыдо но усьтэм сюлэмо луэменыз висъяське. Со ИП Хадеева Р. Я. организациын ужа. Таӵе семьяын шумприч пияш луыса будӥз Денис но. Со сяна семьяязы вань на бадӟымез пизы — Артём. 

Денисэз тӥ но тодӥськоды, дыр. Бигер нюръяськон сярысь материал потыку, одно ик вормисьёс пӧлын солэн нимыз пусъемын луэ. Кызьы удмурт пияш бигер калыклэн спортаз вуиз, та сярысь со тӥледлы ачиз мадёз:

— Спорт адямилы котькуд удысын азинскыны юрттэ, шуг-секытъёс пыр потыны дышетэ. Но валтӥсез — тон ваньзэ быгатӥськод шуыса возьматэ, нырысь ик аслыд та малпанэз юн пыӵатэ. Спорт пӧртэм луыны быгатэ. Одӥгаз шаплы луоно, кыкетӥяз кужым бадӟым инты басьтэ, куинетӥяз дӥсьтонлык нырысь радэ султэ, но вань кадь спортын одно ик туж мур малпаськоно луэ. «Сила есть, ума не надо» шуэм визькыл татчы воксё уг тупа. Нюръяськон сяна, мыным волейбол но футбол кельшо. Спортэз яратыны мыным нырысь ик Руслан Эрнстович (Михайлов — ред.) юрттӥз. Со зэмзэ но нылпиослэн тазалыксы понна сюлмаське. Школаын мон озьы ик куасэн бызьылонъя ӵошатсконъёсы но пыриськисько вал. Школамы сокем бадӟым ӧвӧл бере, котькуд ӵошаТсконъёсы пыриськыны луонлык вань. Бигер нюръяськонэ но огшоры тунсыко луэмен гинэ пыриськыны кутски. Бӧрысь кельшиз. Тон ковёр вылын аслэсьтыд кужымдэ возьматӥськод, вылезлы дышетскиськод. Тренере но — Ринат Фоатович (Хайрутдинов — ред.) — удмурт шуыса уг висъя, кызьы мукетъёсты дышетэ, озьы ик монэ но. Котькыӵе ортчись вожвылъяськонъёсы пыриськыны тыршисько. Туэ мон 9-тӥ классэз йылпумъяй. Азьланяз Сабаысь аграрной колледже мыныны малпасько. Ваньмыз пӧрмиз ке, колледжын но асме умой паласен возьмато шуыса оскисько. 

Тӥни озьы ик аслаз кужымезлы оскыса, Денис вуиз бигер нюръяськонэ. Секытъёсыз сярысь со уг вера, котьку умой паласен гинэ ваньзэ пусъе. Таӵе сямо луэмез нырысь ик семьяысьтыз потэ, луоз. 

— Ӟеч сямо, валась, сюлмо адями луыса мед будоз кадь потэ милемлы. Адямиосты медаз висъя, матысьёссэ, котырысь адямиосты яратон но гажан сямъёсыз медаз кысэ. Денисмы милям туж позитивной, усьтэм сюлэмо, шуысал. Солэн пушказ оптимизмез ноку уг быры кадь. Улоназ котькыӵе шуг-секытъёс пумиськизы ке но, оскисько: соосты капчиен вормыны быгатоз. Со ваньзэ чиданы быгатэ, пуктэм ужпумъёссэ одно ик быдэстоз, кылзӥськись, лякыт сямо. Ми сое чурытгес кутыса будэтӥськом, кызьы калыкын верало «кнутом и пряником» (серекъяса). Пиос нуныяськемез уг ярато ук, нимысьтыз ик кӧня ке будэмзы бере воксё сыӵе эркиянъёслэсь возьдасько ини. Дорамы но со валтӥсь юрттӥсьмы луэ, косэм ужъёсты котьку быдэстэ. Оглом вераса, кыӵе ке удысын солэн уг ке пӧрмы, мукетаз со ассэ одно ик шедьтыны быгатоз. Сыӵе нюръяськонъёс спортын гинэ мед луозы, — мылкыдъёсыныз люкиськиз Ольга Яковлева.

Спорт сяна, Денислы удмурт фольклор но матын. Школаын ужась «Инвожо» коллективын со эктӥсь но, кырӟась но луэ. Соин копак спортэ выжемын шуыса эн малпалэ. Вань удмурт егитъёсмы пӧлын сыӵеосыз, кудъёсыз асьсэлэсь дырзэс но кужымзэс шонер ӧре лэзё. Азьланяз спортын, лулчеберетын, мерлыкын басьтэм тодон-валанъёсыз бервыло луыса улоназ мед шӧдӥськозы. Таӵе егитъёсын данъяськоме, соослы котькуд кутсконъёсазы пыкет луоме!