Вань улон — калык понна (фото)

Ас калыкез понна сюлмаськись, гуртоосызлэсь улонзэс каньылгес карыны тыршись, калыкын кылдэм пӧртэм юанъёсты ӝегатскытэк сэрттӥсь-пертчись, шонерзэ вераны кышкасьтэм — сыӵеен тодо Покчи Лӧзя гурт поселениын азьвыл глава луыса ужам Николай Александровичез. Ужзэ рос-прос быдэстыны тыршеменыз гинэ ӧвӧл, калыкын ассэ огшоры, каньыл воземеныз но бадӟым гажанэ вутскыны быгатэм со. Но Николай Александрович ассэ кивалтӥсьёсын одӥг радэ пуктыны уг яраты, малы ке шуоно солэн трос ужано аръёсыз колхозын, огшоры ужась адямиосын валче ортчемын.

Ачиз сярысь со вакчияк тазьы вераны яратэ: «кытын вордски, отын ик кулэ луи». Та кылъёс, зэмзэ но, солы туж тупало — воргоронлэн вань улонэз Покчи Лӧзя гуртэн герӟаськемын. Татын со вордске, дышетске, ужа, улэ… Армиын служить карон вакытаз гинэ вордскем палъёссэ кельтэ — 1972-1974-тӥ аръёсы Брестын Атаймузъемез азьын дано ужпумзэ быдэстэ.

— Котьма мед луоз, но сюлмы монэ котьку гуртэ, вордскем палъёсам кыскиз, — кутске со ачиз сярысь мадёнзэ. — Армия бере но кема ӧй малпаськы азьпал улонэ сярысь: гуртам бертыса, со дыре Ленин нимо колхозэ механизатор луыса ужаны интыяськи. Соку ик валай: мон аслам интыям.

Ӵапак со дыре ик, егитысеныз, кутско Николай Александровичлэн тыршыса, вань кужымзэ сётыса ужаны тыршем аръёсыз. Ужан сяна, егит воргорон, Буинск городын дышетскыса, зоотехниклэсь ӧнерзэ но басьтыны вутске. Солэсь тыршемзэ, ужез шоры кылкутыса учкемзэ кивалтэтын ӝог синйылто: 1979-тӥ арын Николай Александровичлы Улын Ушма гуртысь фермаен кивалтыны ӵекто. Солэн ужан вакытаз Ленин нимо колхоз туж бадӟым вормонъёсы вутске, азьмынӥсьёслэн радаз луэ: республикаысь механизаторъёс пӧлын «Комсомолец Татарии» газетлэн призэзлы ортчытӥськем конкурсын Николай Петров 1-тӥ инты басьтэ, кыскем йӧллэн быдӟалаез 2800-ысен 5000-лэсь тросгес килограмм луэ. Быдэс Россиын толъёнъя Ленин нимо колхоз 1-тӥ инты басьтэ. Берлогес Николай Александровичез пудо вордонъя СССР-ысь кун премилы ӵекто. Фермалэн коллективез, азьмынӥсьёслэн радазы луэмысь, кивалтӥсенызы ӵош ас дыраз Венгрие но Румыние мыныны быгатэ.

— Дас ар кивалтӥ мон соку фермаен, — азьланьтэ веранзэ воргорон. — Уж кылкутымон, секыт, трос дырез кулэ карись вал. Но мон ужлэсь кышкась ӧвӧл. Тӥни озьы 1989-тӥ арозь, шонергес вераса, дас ар ӵоже, мон фермаен кивалтӥ. Ужакум, эшшо дышетски: Казаньысь ветеринарияя институтын тодон-валан басьтӥ.

1989-тӥ арын Николай Александровичлы Покчи Лӧзя гурт советын председатель луыса ужаны ӵекто. Ачиз но со валаса уг вутты, кызьы кивалтӥсь луыса ужаны кутске. Секыт уж шоры бадӟым кылкутонэн учкыса, мыло-кыдо тыршыса ужаны кутске ке но — та дырозь тодмо луисьтэм пӧртэм кагаз ужъёсын, постановлениосын, документъёсын пумиське — сюлмыз сое весь колхозэ кыске. Озьы, одӥг но ӝыны арскын, со выльысь Ленин нимо колхозэ ужаны берытске.

— Мон колхозник вал ук… Мыным фермаын скалъёслэсь быжъёссэс берыкъяно вал, кабинетын кагазъёсты бергатъяса пукытозь… — шуэ Николай Александрович, оло серекъяса, оло серекъятэк.

Кызьы луиз ке но, скалъёслэсь быжъёссэс со кема уг берыкъя — 1991-тӥ арын итымен кивалтыны кутске. Вань сюлэмзэ сётыса ужа со колхозын — механизатор луыкуз но, фермаен кивалтыкуз но, итымын ужакуз но. Калык сое яратэ, гажа, кивалтэт тыршемзэ адӟе… Соин Николай Александрович 2005-тӥ арысен нош гурт поселениен кивалтыны кутске (2012-тӥ арозь кивалтӥсь луыса тырше). Со уг ваты, та уже кивалтэтлэн куременыз ужаны интыяськыны соглаш луиз шуыса, но со кадь калыкез понна тыршись, шуг-секытъёсты сэрттӥсь-пертчись кивалтӥсез утчаса утьыны кулэ али!

— Советской кыданэн адями бере, мыным оскем уж борды мон котьку тыршыса басьтӥськи. Огшоры, «луиз ке луоз, ӧз ке — уз» шуыса, номыр борды ӧй кутскы. Сельсоветын ужан понна адямиосын вераськыны, огъя кыл шедьтыны быгатыны кулэ. Та ласянь фермаын ужакум умой практика басьтӥськем вал ини. Ма, зэмзэ верано ке, практикатэк но луысал, дыр, – адямиен адями сямен вераськид ке, со тонэ котьку валалоз. Секыт вал кагаз ужъёс ласянь. Вылаз ик, аръёс но соку секытэсь луизы – перестройка, воштӥськонъёс..,— шуэ Николай Александрович.

Со секыт вакытэ солы юрттэ аслаз та дырозь люкам опытэз: сельсоветын ужаны кутскытозяз, пиосмурт кема аръёс ӵоже ёрос Советлэн депутатэз луэ. Арлы быдэ пыриське отчёт собраниосы. Нялтас вераса, одӥгаз сыӵе собраниын депутат поселенисьтыз калыкез понна ӟеч уж лэсьтэ. Люкаськонэ вуэм связья министрлы (нимзэ ум поттылэ) Николай Александрович таӵе кылъёсын вазиське: «Ёрослэсь кык-куинь иськемын интыяськем гуртамы связь ӧвӧл». Та вазиськонэзлэн пайдаез луымтэ, соин одӥг арскын та ик юанэз Николай Александрович нош огпол ӝутэ — соку ини Покчи Лӧзяе но мукет матысь гуртъёсы связь вуэ. Кӧня луизы соку Николай Александровичлы тау карись адямиос!..

Секыт но кылкутымон ужын бервыло ужан понна, Николай Александрович кема утча аслыз юрттӥсь но. Поселенияз пырись котькуд гуртэ вуылэ, адямиосын вераське, соослэн шуг-секытъёсынызы тодматске.

— Адямиосын котьку вераськыны тырши. Кылын гинэ ӧвӧл, ужын юрттыны тырши, — вакчияк вера воргорон.

Тыршемезлэн бервылъёсыз син азьын: Николай Александровичлэн ужан аръёсаз Лӧзя гуртын черк лэсьтыса быдтэмын, Вылын Ушма гуртын выль урамысь юртъёсы газ но ву пыртэмын, Покчи Лӧзяын выль, чебер школа сылэ. Та бадӟым ужъёсын, мазэ веранэз, гурт поселенилэн кивалтӥсезлэн но люкетэз вань, шумпотымон.

Гурт поселениын ужаса дугдэмез бере пенсие потытозяз но, дано шутэтсконын луыкуз но, Николай Александрович колхозын ужзэ азьланьтэ — зоотехник-селекционер луыса тырше.

Туннэ нуналэ Николай Александрович шутэтске ни. Но тэк пуконэз со али но уг тоды: кузпалэныз Любовь Петровнаен ӵош соос пудо вордо, сад-бакча возё, со сяна чорыганы ветлыны туж яратэ Николай Александрович. Огъя вераса, мӧзмыны солэн дырыз ӧвӧл.
Туннэ, 21-тӥ оштолэзе, интыысь аскивалтэтын тыршисьёс асьсэ ӧнер праздниксэс пусъё. Учырен пайдаяськыса, та удысын тыршем но ас калыкез понна трос ӟеч уж лэсьтэм кивалтӥсез ӧнер праздникеныз сюлмысь ӟечкыласькомы. Тау тыршемдылы, Николай Петрович!