Вӧйдыр: калык шулдыръяськон но сям-йылолъёсты утён

Вӧйдыр — вашкала праздник, кудӥз котькуд ар пӧртэм выжы калыкъёсты но пӧртэм осконысь адямиосты огазея. Со шулдыръяськон но шудонъёс, табань сиён, куро мунёез сутон. 

Та нуналэ адямиос ог-огзылэсь пӧртэмлыксэс вунэто но шумпотон мылкыдэн пыӵало. Праздниклэн историез выжыеныз мур пыӵамын кыдёкысь вакытъёсы, куке вашкалаосмы тулыслэсь кутсконзэ пусйизы но толалтэен люкиськизы. Туннэ но Вӧйдыр вашкалаосмылэсь сям-йылолъёссэс тодэ вайыны но астэ бадӟым эшлыко семьялэн оглюкетэз кадь шӧдыны луонлык кылдытэ. 

Вӧй праздникез калык чидатэк вите, ческыт сиёнъёс дася, кин мильым, кин табань пыже, ог-огзы доры куное ветло, сьӧлыкъёссэс куштыны куро (Простить карон нунал ӵапак Вӧйдырлэн берпуметӥ нуналэзлы тупа угось) но черк календарьысь тужгес валтӥсь кӧсутёнлы — Быдӟым визьлы — дасясько. 

Тол келянлы сӥзем праздникез ортчытон ёросысь куд-ог гуртъёсын ӟеч сямлы пӧрмемын ини. Туэ но 22-тӥ тулыспалэ праздник ужрадъёс ортчизы.

Та ласянь Покчи Лӧзя гурт азьветлӥсь луэ, дыр. Отын толэз келян, Вӧйдырез пусъён — традиционной ужрадлы пӧрмемын. Лӧзяос нырысетӥос пӧлын луыса Вӧй келян йылолэз улӟытӥзы но ог 15 ар ӵоже ини дугдылытэк сое шулдыр пусъё. 

— Нырысь школа но пыриське вал та ужрадэз ортчытонэ. Котькуд класс табань пыжылӥз, эмблема лэсьтылӥз. Котькуд ар тунсыкогес ортче вал праздникмы, — тодэ ваёнъёссэ вера Покчи Лӧзя лулчеберетъя юртысь устолыкъя кивалтӥсь Галина Петрова.

Ципья черкогуртын азьло дырысен паськыт масштабен Тол келян праздник ортче вал. Али но та сямзэс соос уг вунэто. Туэ но, 22-тӥ тулыспалэ, Дун-чылкыт Гурий нимо храм дорын праздник радъязы. Ёросысь мукет гуртъёс но соослэсь кыльытэк тыршо: кытын ке шергес, кытын ке арысь аре Вӧй праздникез радъяло. Ӟаныын туэ Вӧй келянлы сӥзьыса праздник луиз. Турьяын, Вукогуртын арлы быдэ калык шулдыръяськонъёсты ортчыто. 

— 22-тӥ тулыспалэ ӝыт ми но Вӧйдыр праздник ортчытӥмы. Пичиос уно люкаськизы, урамын ик соосын футбол шудӥмы. Анайёссы но потӥзы. Пыштурынэн ческыт чай пӧзьтӥмы, табанянь пыжимы. Чучело лэсьтӥмы но сое ӝуатӥмы. Мылысь-кыдысь шудӥмы, кырӟамы, юмшамы, — ивортэ Турья гуртысь клубен кивалтӥсь Ирина Исьмекова.

Тӥни озьы, Вӧйдыр праздник пӧртэм лулчеберетъёсысь но йӧслыкъёсысь адямиос пӧлын эшъяськонэз но ог-огдэ валанэз, йӧскалык йылолъёсты утьыны юрттэ, огъя луон мылкыдэз но историен данъяськонэз азинтэ. Котькуд ар та усто праздник ас котыраз трос пыриськисьёсты люка, со шуныт, яратон но каньыл улон атмосфера кылдытэ.

 И.Исьмековалэн но М. Ишмурзиналэн туспуктэмъёссы.