Вордскем кыл луонлыкъёсты усьтэ

Шумпотыса вераны быгатӥськом, пӧлазы удмурт пиналъёсмы но вань шуыса.

Покчи Лӧзя шоръёзо школаысь нылъёс — 8-тӥ классысь Антонова Елена но 10-тӥ классысь Ефремова Алина 3-тӥ интыосты басьтӥзы (дышетӥсьёссы — Антонова Наталия Львовна но Пчельникова Ольга Мироновна). Сюлмысь ӟечкыласькомы нылъёсты но, тодон-валан сётӥсьёссэс но та огъя вормонэнызы, азьланяз азинсконъёссы эшшо но трос, эшшо но бадӟымесь мед луозы!

Асьме ёросысь призёръёс пӧлы шедизы на Нуринер школаысь пиналъёс но: 11-тӥ классысь Гафиуллина Ландыш 2-тӥ луиз, нош 10-тӥ классысь Нотфуллина Илнара — 3-тӥ (дышетӥсьсы — Гильфанова Разина Нургаяновна).

М. К. Аммосов нимо Северо-Восточной федеральной университетэн радъям вордскем кылъёсъя олимпиада 8-11 классъёсын дышетскись пиналъёс понна чакламын. Со пӧлаз 40 кылэз басьтэ (абазин, авар, агул, алтай, башкир, бурят, даргин, долган, кабардино-черкесской, калмык, карачаево-балкарской, карел, кет, коми, крымскотатарской, кумык, лак, лезгин, пор, мокша, ненец, ногай, осетин, ӟуч, рутул, табасаран, бигер, тува, удмурт, украин, хакас, цахур, чечен, чуваш, чукот, эвенк, эвен, эрзя, юкагир, якут кылъёс).

Олимпиада 2 этапен ортче. Нырысетӥез — быръён этап. Со дистанционно ортче. Кыкетӥез — йылпумъян этап. Соиз очной амалэн радъяське Северо-Восточной федерльной университетын но соорганизатор луись мукет вузъёсын. Татарстанын — со КФУ. Ӵапак КФУ-ысь Кылосбуръя но межкультурной коммуникация институтын кылдытэм площадкаын 18-тӥ южтолэзе ортчизы анай кылъёсъя олимпиадаос.