Вордскем музъемез ас пизэ данъяз

8-тӥ оштолэзе Ижкарысь «Аксион» культура юртын ортчиз «Айкай» театрлэн яркыт тулыс концертэз. «Яркыт тулыс шӧм пыртӥзы калыклэн сюлмаз пырем кырӟанъёс но эктонъёс, озьы ик выль дасям постановкаос: «Кукморо дюмшан сямъёс», «Ой, во поле» ӟуч сюан гуръёс, «Нравится мне ваша поза унылая» ӟуч городской романс. Со сяна, нырысьсэ возьматэмын вал «НАРЯДные песни» сузьет, кудӥз сӥземын «Айкай» театрлэн кивалтӥсезлэн, лулчеберет удысысь дано ужасьлэн юбилярлэн творчествоезлы. Ӟечкылан кылэн вуизы Татарстанысь Балтась муниципал ёросысь исполнительной ӧрилэн кивалтӥсезлэн воштӥсез Гайнутдинов Ильгам Фидаелевич, бигер улосысь удмурт лулчеберетъя йӧскалык автономиен кивалтӥсь Герасимов Андрей Сергеевич. Сцена вылысен Пётр Павловичлы сётэмын медаль «За заслуги перед Балтасинским муниципальным районом», ялэмын, солы «Балтась ёрослэн сӥё-дано кунмуртэз» ним сётэмын шуыса…» — тазьы гожтэ «Айкай» театр аслаз ВКонтакте мерлыко вотэсысь огиназ. Шумпотымон ивор! Сюлмысь ӟечкыласьком Пётр Павловичез юбилееныз но та данъетъёсыныз! Анаеныз, ӵыжы-выжыосыныз, Кушкет гурт калыкен ӵош данъяськиськом асьме аспалэнымы, Балтась музъемлэн дано пиеныз!  

«Вуж Кушкет гурт — уникальной гурт, со Россиысь лулчеберетлэсь геройзэ будэтӥз-визьнодаз! Пётр Павлович, ӟечкыласько Тӥледыз Балтась ёрослэн главаезлэн нимыныз. Тӥляд люкетты дунъяса быдтонтэм — сое уг луы килограммен но, иськемъёсын но дунъяны…», — таӵе кылъёсын ӟечкылам Пётр Даниловез Балтась ёросысь исполнительной комитетлэн кивалтӥсезлэн воштӥсез Ильгам Гайнутдинов. 

Фото: https://vk.com/folkaikai