Вормон нунал матынъяськемен жугиськон аръёсысь адӟемъёс выльдӥсько

Гуртысь пиосты оже басьтэмзы бере таза-таза нылъёслы но черод вуэм. Тани соос: Дабакова Мария Павловна, Демидова Фёкла Афанасьевна, Захарова Анисия Ивановна, Копарова Марфа Васильевна, Карабаева Мария Васильевна, Миронова Марфа, Наздекова Мария Степановна, Савельева Ираида Михайловна, Петрова Ольга Андреевна, Плотникова Федосия Ивановна.

Дабакова Мария жугиськонысь бертэм бераз Ципья аптекаын санитарка луыса ужаз. Семья ӧз кылдыты. 1979-тӥ арын кулӥз.

Демидова Фёкла ожысь бертыса семья кылдытӥз, 4 нылпилы улон кузьмаз. Ужаз фабрикаын. Али дыре кулэмын ини.

Захарова Анисия жугиськонысь бертэм бераз семья кылдытӥз, 4 нылпиез вал. Бухгалтер луыса ужаз Ципья сельсоветын но сельпоын. (Кулэмын).

Копарова Марфа семья ӧз кылдыты, ужаз Ципья больницаын санитарка луыса. Али дыре кулэмын.

Карабаева Мария телефонистка луыса служить карем. Жугиськонысь бертэм бераз Ципья но Балтась почтаосын телефонистка луыса ужаз. (Кулэмын).

Миронова Марфа жугиськонысь бертэм бераз Ципьяын паспортной столын ужаз. Одӥг нылыз вань. (Кулэмын).

Наздекова Мария жугиськонын кулэм 21 декабре 1944 арын. Ватэмын Латвиын Салдусский район, Кусари (Пуссори) гуртын.

Савельева Ираида. 1938 арын Ципья шоръёзо школаез йылпумъя. 1938-1942 аръёсы пионервожатой луыса ужа. 1942-тӥ арын май толэзе Армие басьто. Северо-западной но Северо-восточной фронтъёсын нимаз 95-тӥ полкын секретной штабын служить каре. Отын ик сое партие басьто. Со СССР, США, Англия державаослэн кивалтӥсьёссылэн 1943-тӥ арын ортчем Тегеран конференциязы пыриськем, Сталинэз, Рузвельтэз, Черчилез адӟем фронтовик.

Жугиськонысь бертэм бераз Ираида Михайловна Ципья школаын старшой пионервожатой луыса ужа. Арча педучилищеез дышетскыса быдтэ но начальной школаын дышетӥсь луыса ужа. Отысен пенсие потэ. 1973-тӥ арын «Татарстанысь сӥё-дано дышетӥсь» ним сёто. «За доблестный труд» медален наградить каро. Семья ӧз кылдыты. Туннэ нуналэ кулэмын ини.

Петрова Ольга Андреевна Дурга гуртын вордскем. 1941-тӥ арын 8 класс дышетскемез бере Дурга гуртысь сельсоветэ секретарь карыса басьто. 1943-тӥ арын армие басьто. Казане зенитно-ракетной полке интыяло. Со курсэз быдтэм бераз сое 1944 аре 1-тӥ Украинской фронтэ лэзё. Соослэн ужзы луэ: — чугун сюрес станциосты, выжъёсты немец самолётъёслэсь возьман. 1945-тӥ арын бертэ дораз. Ципья райкомын пропогандист луыса ужа. Берло аръёсы Ципья шоръёзо школаысь библиотекаын ужа. Семья кылдытэ — 7 нылпиез вань. lll степенё «Материнская слава», «Ветеран труда» медальёсын наградить каремын. Ципья школаысен пенсие кошке. (Кулэмын ини).

(Савельева И.М. но Петрова О.А. сярысь «Год учителя — 2010» книгаысь басьтэмын).

Плотникова Федосия Ивановна Сырья гуртын вордскем. 19 июле 1942-тӥ арын сое жугиськонэ басьто. Со Прибалтийской фронтын 43-тӥ полкын служить карем телефонистка (радистка) луыса. 1944-тӥ арын бертэ. Бертэм бераз Ципья почтае телефонистка луыса ужаны пыре. Сокращение сюре. Берло аръёссэ почтальонка луыса ужа. Семья кылдытэ, нылпиоссы уг луо. 9 мартэ 2003 арын кулэ.

Елизавета Абрамова

Ципья черкогурт