Выль кужымен – выль сюресэ

Куарусёнэз котькуд дышетскись кыӵе ке аспӧртэмлыко мылкыдэн пумита. Нырысетӥ классэ вамыштӥсь нылпи понна со — шумпотон, выль дуннее сюрес усьтӥськон вакыт, нош 11 классысь дышетскись понна — со кылкутон но малпаськытӥсь ар. Школаез йылпумъясь пинал азьын бадӟым ужпум — ӟечен экзаменъёсты сётыса, кельшись ӧнеръя тодон-валан басьтон но мерлык понна оскымон но пайдаё кунмурт (гражданин) луон. Мукет классъёсысь нылпиос понна но выль дышетскон ар выль луонлыкъёсын герӟаське. Кин ке выль предметэн тунсыкъяськыса, шӧдскымон азинсконъёсы вутске, кин ке юнгес спортэн эшъяськыны кутске, кин ке воксё мукет ӧре выже. Котьма ке но школа — со астэ эскерон но астэ утчан вакыт. 

Арысен аре дышетскон удысын пӧртэм воштӥськонъёс ортчо. Куронъёс чурытомо, технологиос азинтӥсько, ваньмыз выльдӥське но туала улонлы тупась луэ. Гурт удысын ужась киос, валась ӧнерчиос туж кулэ шуиськом, но туала егитъёс ӵемысь капчигес но чылкытгес уже интыяськыны тыршо, соин шудзэс утчаны тросэз городэ кошко. 

2025-2026-тӥ дышетскон ар выль кужымен кутске нылпиосты визьнодан уж борды. Дышетӥсьёс гужем куспын дышетон программаоссэс выльдӥзы, мар ке тунсыкозэ пыртӥзы, выль технологиослы дышетскизы. Йырзэс кулэтэм малпанъёслэсь кӧня ке «тӧлатыса», матысь дыре соос нош ик нылпиосын огкылысь луыса, гижысь-пиньысь тодон-валан дуннее выёзы. 
Кылем дышетскон ар вормонъёслы туж узыр вал. Газет бамъёс пыр тӥледыз но ялан соосын тодматыса улӥм. Туэ но соос ӧжыт уз луэ шуыса оскиськом. Нош кыӵе мылкыдэн дасясько дышетскисьёсмы выль дышетскон арлы, кыӵе валтӥсь ужпумъёс пукто соос азязы? Ӵектӥськом куд-ог пиналъёслэн малпанъёсынызы тодматскыны.

Милана Корнилова,
О. Н. Исаев нимо Ӟаны шоръёзо школаысь дышетскись:

— Вуоно 2025-2026-тӥ дышетскон арын выль тодон-валанъёс басьто шуыса оскисько. Урокъёслэсь но занятиослэсь тунсыко но пайдаё луэмзэс витисько. Валтӥсез — ӟечлыко дышетскон но азинскон. Котькуд ужрадэ мылысь-кыдысь пыриськыны мед кылдысал. Таяз дышетскон арын азям нырысетӥ интые таӵе сямъёсты пуктӥсько: ужан мылкыд, асвалануж (самосовершенствование) но пуктэм ужпумъёсты пумозяз быдэстыны быгатонлык. Туэ мон 9 классэ выжисько, соин шутэтскыны дыр но ӧжыт луоз, дыр, малы ке шуоно ваньмон дырез экзаменъёслы дасяськон понна сӥзёно. Ведь нагрузка туж бадӟым. Дышетскон сяна, внеучебной ужын но вутсконо на. Соин дышетскон но внеучебной уж куспын кызьы ке но баланс шедьтыны тыршоно луоз. Вань дышетӥсьёсты но нылпиосты выль дышетскон арен ӟечкыласько! Азяды пуктэм ужпумъёсты одно ик мед быдэсмозы.
Миланаез нырысетӥ экзаменъёс ке возьмало, Покчи Лӧзя шоръёзо школаысь Елена Антонова туэ экзаменъёсты умоен сётыса, 10 классэ выже ини. Азяз солэн 2 ар тодон-валан басьтон сюресэз, соин но малпанъёсыз сюлэмшугъяськытӥсь экзаменъёсын герӟаськемын. 

Елена Антонова,
Покчи Лӧзя шоръёзо школаысь дышетскись:

— Таяз дышетскон арын мон мынӥ-сько 10-тӥ классэ, малпасько тыршыса дышетскыны, малы ке шуоно одӥг арскын кутскоз секытгес дыр, кудаз экзаменъёслы тросгес дасяськоно луоз. Малпасько бадӟым нагрузка луоз, малы ке шуоно азьланяз ӧнер басьтон сярысь малпаськоно, классамы ми ӧжытгес кылем бере, дышетӥсьёс ваньмес юаны но вуозы. Нош вылӥ дышетскон инты сярысь ке верано, мон пумозяз бырйыса ӧй вутты на. Таиз ар но та быръён понна туж кылкутӥсь луоз. Вань дышетскисьёс пайда гинэ мед басьтозы котькуд дышетскон нуналлэсь.

Юлия Тукаева,
Ципья шоръёзо школаысь дышетскись:

— Кыӵе ке аспӧр-тэмлыко мылкыдэн возьмасько 2025-2026-тӥ дышетскон арез, ведь мон туэ 11 классэ выжисько, бадӟым улонэ султонлэсь одӥг вамыш гинэ люке табере. Таяз дышетскон арын эшъёсын пумиськонэз возьмасько, гужем каникулъёс вакытэ мӧзмыны вуим ини ог-огмылэсь. Озьы ик котькуд дышетскон ар — со выль тодон-валанъёс басьтон вакыт, тунсыко урокъёс, выль ужрадъёс, проектъёс... Нырысетӥ интые азям дышетсконэз но экзаменъёслы дасяськонэз пуктӥсько. Соос куспын шутэтсконлы но дыр висъяно луоз на. Огъя вераса, кызьы ке но ваньзэ рос-прос радъяно вал. Азьло аръёсын ӵошатыса, туэ эшшо но бадӟым нагрузка луоз, внеучебной ужъёслы сокем трос дырез висъяны уз луы ни. 11 классын профильной занятиос тросгес, контрольной ужъёс но экзаменлы дасяськонъёс, соин дышетскон азьпал радын сылоз.

Таӵе ӝутскем мылкыдэн нылъёс выль дышетскон арлы дасясько. Кызьы адӟиськом, котькудӥз дышетсконзэ нырысетӥ интые пуктэ. Нош кызьы со малпанъёс, пуктэм ужпумъёс быдэсмозы зэмос улонын, соиз ини котькуд дышетскисьлэсь аслэсьтыз потэ. Быдэс ар юн тыршиськод ке, ужъемышъёс но шумпотымонэсь луозы. Та веранэз нылпиос арлы быдэ юнмато. Соослэн сюлмысь тодон-валан басьтыны тыршемзы ёрос, республика но быдэс Россия масштабен пусйиське.

Вань дышетскисьёсты, дышетӥсьёсты, дышетон удысэн герӟаськем ужасьёсты выль дышетскон арен ӟечкыласьком! Оскиськом, таяз дышетскон арын но тӥ бадӟымесь азинсконъёсы, вормонъёсы вутскоды. Вань малпанъёсты одно ик мед зэмалозы, нош ужан мылкыдды нуналлы быдэ мед йылоз гинэ!