Татарстанысь удмуртъёс асьсэлы выль азьветлӥсь бырйизы

Отчы ёросъёсысь но каръёсысь удмурт лулчеберетъя йӧскалык огазеяськонъёслэн кивалтӥсьёссы, ёзчиоссы, удмурт азьветлӥсьёс люкаськизы. Исполнительной комитетлэн кивалтӥсезлэн воштӥсез Ильгам Гайнутдинов валтэм улсын ужрадэ Балтась ёросысь делегация но пыриськиз.

Ужрадлэн дано куноосыз пӧлын вал Татарстан Республикаысь Кун Кенешысь Дышетонъя, лулчеберетъя, тодосъя но йӧскалык юанъёсъя комитетлэн Тӧроез Зарипов Айрат Ринатович, Татарстан Республикалэн Раисэзлэн кунпуш политикая Департаментысьтыз йӧскалык политикаез улонэ пыӵатонъя Управленилэн кивалтӥсезлэн воштӥсез Ефимов Евгений Петрович, Удмурт Элькунысь йӧскалык политикая министр Петров Эдуард Степанович, вань удмуртъёслэн «Удмурт Кенеш» мерлыко огазеяськонзылэн тӧроез Ураськин Андрей Иванович но мукетъёс.

Правленилэн Тӧроез Андрей Сергеевич Герасимов Татарстанын улӥсь удмуртъёслэн туннэ югдурзы, лулчеберетъя йӧскалык огазеяськонлэн 2022-тӥ арысен кутскыса 2024-тӥ арозь ужамез сярысь вераз, йылпумъянъёс лэсьтӥз.

Озьы ик люкаськонын Татарстанысь удмурт егитъёслэн огазеяськонзылэн ужамез, Балтась но Кукмор ёросъёсын азинлыко ужан амалъёс сярысь но докладъёс чузъяськизы.

Сяме пыремъя котькуд аре та ужрадын элькун «Гырон быдтон» сярысь но вераськон ӝутӥське. 2025-тӥ арын Татарстанысь удмуртъёслэн «Гырон быдтон» праздниксы ортчоз Балтась ёросын. Шулдыръяськонэз ортчытон сярысь вераз Балтась ёросысь исполнительной комитетлэн кивалтӥсезлэн воштӥсез Ильгам Фидаелевич Гайнутдинов. Со ивортӥз, туэ элькун праздник Ципья черкогуртын ортчоз шуыса.

Огъя собранилэн одӥгез валтӥсь ужпумез луиз Татарстанысь удмуртъёслэн лулчеберетъя йӧскалык огазеяськонзылы выль Тӧро быръён. Тросэзлэн куара сётэменыз Андрей Сергеевич Герасимов интые юнматӥзы Алексей Андреевич Арзамазовез. Азинсконъёс выль кивалтӥсьлы! Нош Андрей Сергеевичез Татарстанысь Калыкъёслэн ассамблеязылэн Данъян грамотаеныз пусйизы но Татарстан Республикаысь Кун Кенешлэн Тӧроезлэсь кузьымзэ сётӥзы. Ӟечкыласьком! Выль вормонъёс Тӥледлы, Андрей Сергеевич!

Пумиськон йылпумъяськиз Поволжьын улӥсь калыкъёслэсь дӥсьсэс возьматӥсь адӟытонэн.

Туспуктэмъёс: Юлия Щербакова