Вылӥ званиен данъязы

Ужкагаз официальной сайтын 22 куартолэзе потӥз. Соя Удмурт Элькунысь фольклор кырӟанъя но эктонъя «Айкай» кун театрлэн кивалтӥсезлы, аспалмылы, «Россия Федерациысь лулчеберет удысысь сӥё-дано ужась» ним сётӥськоз шуыса тодыны луэ.

Пётр Даниловлы та вылӥ данъет лулчеберетэз азинтонэ бадӟым ватсэт пыртэмез но трос аръёс ӵоже пайдалыко ужамез понна сётэмын. Зэмзэ но, та удысэн Пётр Павлович 8 классэ йылпумъямез бере ик юн герӟаськиз шуыны луэ ини.

Пётр Павловичлэн лул-чеберетэн кусыпъёсыз Дебёсысь педагогикая училищеын дышетскыкуз юнманы кутскизы. Кытын гинэ со ӧз дышетскы, котькудаз аслэсьтыз тодон-валанзэ будэтыса, удмурт калыкез азинтонэ бадӟым инъет пыртӥз. Соин ик, дыр, удмурт калыклэсь вань чеберзэ но аспӧртэмлыксэ со Удмуртиысь валтӥсь «Айкай» кун театр пыр возьматэ. Со сяна, Пётр Павлович удмурт калыклэсь огъя тодметъёссэ гинэ уг возьматы, со пӧртэм интыосын улӥсь удмуртъёслэсь аспӧртэмлыкъёссэс шарая. Та бадӟым уж фольклорез люканэн гинэ уг герӟаськы, со нырысь ик котькуд адямиез матын адӟеменыз синмаськытэ.

Удмуртилэн «валтӥсь марӟанэз» – фольклор кырӟанъя но эктонъя «Айкай» кун театр – туннэ нуналлы быдэс шаерын тодмо ини шуымон. Соос кунгож сьӧрын но удмурт калыклэсь чеберлыксэ возьмато, синмаськыто. Татын но Пётр Павловичлэн тыршемез шӧдскымон. Коллективлэн кырӟанъёсыз но эктонъёсыз пыр со анай кылзэ вӧлмытэ шаерлэн самой пичи люкетъёсаз но.

Вань сюлмысь ӟеч-кыласьком тӥледыз, Пётр Павлович, азинсконъёсыныды. Сӥзиськом азьланяз но шуг-секытъёс шоры учкытэк вамышъяны, котькуд лёгетты капчиен мед сётӥськоз, нош нимды быдэс дуннелы тодмо мед луоз. Вань матысьёстылы, ужъюлтошъёстылы но тодмоостылы тазалык, нош синъёсады ноку но кысӥсьтэм кужым.

Туспуктэм: https://vk.com/folkaikai