Выжыкыл меда вал со (+фоторепортаж)
29 инвожое Менделеевск ёросын удмурт лулчеберетлэн «Гырон быдтон» элькун праздникез ортчиз.
Али гинэ кадь ёросамы ортчытӥмы бусы ужъёсты йылпумъян праздникез, дыр вуиз Элькун Гырон быдтонлы но. Мылкыдъёс пӧзизы, бугыръяськыса сюлэмез басьтӥзы но синмаськытӥзы.
Вазь ӵукна ик сюрес кутӥмы Менделеевск ёросысь Енабердино (удмурт сямен — Тэремшур) гуртэ. Кузь сюресамы милемлы лудъёс, нюлэсъёс, усьтӥськизы пичиесь но бадӟымесь шуръёс, пӧртэм гуртъёс но городъёс пумиськизы. Тунсыко сюресэз учкыны. Ӵыдонтэм чебер, сантэмамтэ интыын вӧлскемын бадӟым луд, татын муспотон инкуазь шоры суред усьтӥське, ваньмыз вашкала вакытысь туспуктэм кадь...
Пыриськод котыртэм интые: тонэ пумитало куролэсь лэсьтэм фигураос, пӧртэм мастер-классъёс, вузкарон интыос, сиён вузась палаткаос, адӟытонъёс, радъяське валтӥсь но пичи сцена — паймымон суред. Котыр удмурт дӥськутэн бадӟымъёс но пичиос, удмурт вераськон — удмуртъёс но, ӟучъёс но, бигеръёс но, поръёс но, чувашъёс но, ваньзы огазе луизы кадь татын.
Кылкутымон ужрадэз радъяны оскиллям Павел Александровлы (Shoner Paul). Егит ӧнерчилэн малпанъёсыз улонэ выжыны быгатӥзы. Праздник кутсконлэн валтӥсь сюжетэз пуктэмын вал М. Петровлэн «Италмас» легендаезъя. Михаил Петрович Петров — удмурт писатель, Вандэмо (Монашево) гуртысь, 2025-тӥ арын солэн вордӥськемезлы 120 ар тырмоз, ӵапак талы ик сӥземын вал туэез Гырон быдтонлэн валтӥсь пуштросэз. Учкисьёс азьын сю пала нылпиос чебер ӵуж италмас луыса вӧлмизы, макем со чебер но тунсыко адӟиськиз! Нош шораз ик усьтӥськиз Италмас — будӥсь нылмурт. Сюжетъя Италмас но егит Камаш ог-огзэсты яратӥзы, узыр Байтуган Италмасэз аслыз карыны малпаз. Но бадӟым югыт яратон ваньзэ вормыны быгатӥз. Та удмурт калыклэн аспӧртэмлыко символэз луэ. Котькуд югыт малпанъёсын лэсьтэм ужъёс одно ик дунъясько, нюръяськон — со азьвыл ик аслэсьтыд кышканъёстэ вормон. Озьы ик саклык висъяськиз италмас сяськалэн дунлыкезлы. Туннэ нуналлы со Горд книгае пыртэмын. Праздниклэн кутсконэз зэмзэ но синмаськытӥз: вошъяськись сценаос, задоресь эктонъёс, котыр ласянь действиос, ваньмыз каньыл мылкыдэн пыӵамын.
Празднике Татарстан Элькунлэн Раисэз Рустам Минниханов но аслаз юрттӥсьёсыныз вуиз, соос пӧлын ТР-ысь лулчеберетъя министр Ирада Аюпова но вал. Удмурт праздникез гажаса но сӥлы карыса, элькунлэн Раисэз удмурт дӥськутэн лыктӥз. Сое пумитазы Татарстанысь но Удмуртиысь коллективъёс, радъяськизы адӟытонъёс, куноосты тодматӥзы удмурт вашкала но туала дӥськутэн, тӥрлыкен. Раисмы но мылкыдъёссэ ӧз ваты:
— Бур нуналэн, праздникен! (удмурт кылын) Тани ваньмыз, мае быгатӥ лыдӟыны. Эшшо тодӥсько на «нянь вань» веранэз. Тау шуэме потэ радъясьёслы, интыысь кивалтэтлы, бускельёслы, кудъёсыз асьмелы пыкет луизы но туннэ асьме пӧлын. Но валтӥсез — тау шуэме потэ котькуд пыриськисьлы, кин гинэ медаз луы: ӟуч, бигер, чуваш, удмурт. Та туж чебер праздник, кудӥз сюрс аръёс пала ортчытӥське, дыр, ни, бусы ужъёс бӧрсьы. Инмар мед сётоз ӟеч пайдаё ар, мед удалтоз ю-няньмы. Вань азинсконъёсмылы шумпотыны мед быгатомы. Туж умой радъямын праздник, мыным туж кельшиз, кызьы тӥ утьыса возиськоды сям-йылолъёстэс, дӥськуттэс. Ми сюан обрядэ но пыриським: пимы — Удмуртиысь, нылмурт — Татарстанысь. Асьмеос адӟиськом: асьме пӧлын йӧскалыкъя керетонъёс ӧвӧл. Ваньмы та чебер дуннеын улӥськом. Ми трос гинэ кужым пыртӥськом анай кылъёсты дышетонлы, вордскем лулчеберетмес, дӥськутэз утёнлы. Азьланяз но тае азинтыны, тодмостыны тыршомы.
Озьы ик Тэремшуре лыктэм куноосты удмурт лулчеберетлэн бадӟым праздникеныз Удмуртиысь Тӧролэн но Кивалтэтлэн Администрацизылэн кивалтӥсез Александр Журавлёв ӟечкылаз, Менделеевске вуиз Вань удмуртъёслэн «Удмурт Кенеш» мерлыко огазеяськонзылэн Тӧроез Андрей Ураськин но трос гинэ мукет кивалтӥсьёс.
Валтӥсь сцена вылын ӟечкыланъёс, данъет сётонъёс ортчем бере концертной программаенызы калыкез шулдыртӥзы дано «Брангурт песянайёс». Соос асьсэлэсь шуныт кырӟанъёссэс котькуд адямилэн сюлмаз пыӵатӥзы. Соос бӧрсьы сценаез чебертӥзы Удмурт Элькунысь калык кырӟанъя но эктонъя «Айкай» театр. Кужмо тӧл луэмысь, оркестрзылы шудыны луонлык ӧз кылды, озьы ке но, артистъёс кужмо тӧл пельтэмлэсь ӧз кышкалэ, вань номеръёсты мыло-кыдо быдэстӥзы. Озьы ик калыкен яратоно артист но — Геннадий Кузнецов — аслаз кырӟанъёсыныз калыкез вырӟытӥз. Солэн егит пиослэн кадь задор мылкыдэз синмаськытэ но куддыр паймытэ.
Удмурт лулчеберетлэн чеберлыкезъя но талантъя «Чеберина но Батыр» конкурсэз но палэнэ ӧз кыльы. Жаляса верано, арысен аре пыриськисьёс ӧжыт. Туэ асьме ёросысь но Батыр гинэ шедиз. Кисаль гуртысь Андрей Игнатьев ёрослэсь данзэ утьыны мынӥз. Возьытэ ӧз уськыты, ассэ сцена вылын юн воземеныз но чебер гитараен шудыны быгатэменыз дано 2-тӥ интыен пусйиськиз.
Ӟечкыласьком Андреез но азьпалан эшшо но бадӟымесь вормонъёс сӥзиськом! Нош Батыр-2024 нимез Кукмор ёросысь Антон Исынбаев басьтӥз.
«Чеберина» вожвылъяськонын Балтась ёросысь нылаш ӧй вал ке но, тунсыко луонзэ ӧз ышты. Аспӧртэмлыко нылмурт дӥськутъёс возьматӥзы удмурт лулчеберетлэсь чеберзэ но пӧртэм луэмзэ. Чеберина-2024 луиз Казаньысь Мария Туктамышева, кудӥз возьматӥз Кукмор ёросысь дӥськутэз.
Нош самой шуныт но дуно вожвылъяськон мон понна луиз — «Шудо-буро удмурт семья». Азьвыл ик семьяос нимысьтыз видеоролик дасязы, татын соос ас улонзы сярысь веразы, вань семьяенызы тодматӥзы, улон радлыксэс возьматӥзы. Татын шӧдӥськиз, кызьы семьяын анай-атайёс яратыса будэто нылпиоссэс, кызьы соос пичи дырысен ик анай кылзэс, лулчеберетсэс пыӵато, макем семья пушкын гажан мылкыд бадӟым. Соос ортчизы пӧртэм ӵошатсконъёсты, татын кулэ вал вераськыса ваньзэ лэсьтыны, семьяос та ужпумез капчиен быдэстӥзы. Малпасько, огъя вань калыклэн шунытэсь тодэ ваёнъёссы кылизы.
Татчы пыриськизы Мамадышысь Никитинъёслэн семьязы, Агрызысь Матвеевъёслэн семьязы (та семьяос вожвылъяськонлэн лауреатъёсыз луизы), 3-тӥ интыен Кукморысь Ахметовъёслэн, 2-тӥ интыен Менделеевскысь — Куликовъёслэн, 1-тӥ интыен Удмурт Элькунысь Можга карысь Ивановъёслэн семьяоссы пусйиськизы.
Нимысьтыз пусйыны кулэ егитъёслэсь «БиГерд» форумзэс но. Соос радъясьёс понна бадӟым юрттэт сётӥзы: организатор но луизы, кураторъёслы но юрттӥзы, этнической мода но возьматӥзы.
Сюлэмез шунтӥсь суред луиз, куке Гырон быдтонлэсь вӧсьлыко символзэ — ӵӧжез — Балтась ёросысь исполнительной комитетлэн воштӥсезлы — Ильгам Гайнутдиновлы — сётӥзы. Со дыре сцена азьын Менделеевскысь коллективъёс пӧсь ӟыгыртонъёсын Балтась коллективъёсты пумитазы. Огъя бадӟым котыртэт лэсьтыса, соос ёросъёслэсь эшлыко улэмзэс возьматӥзы.
Ӝытэз шулдыртӥзы кузпалъёс — Алёна Тимерханова но Иван Котельников, озьы ик аслаз мылкыдо кырӟанъёсыныз калыкез синмаськытӥз Иван Белослудцев. Вань калык сцена азе потыса, задоресь эктонъёсын пачылмиз.
Менделеевскысь Тэремшур гуртын инвожолэн берпуметӥ нуналъёсаз туж чебер праздник радъяськиз. Калыклэсь мылкыдзэ кужмо пельтӥсь тӧл но куашкатыны ӧз быгаты, вань лыктэм калык шумпотыса пумитаз бусы ужъёслэсь йылпумъяськемзэ. Та понна бадӟым тау шуыны кулэ кивалтӥсьёслы но радъясьёслы. Макем шуныт но задор ортчиз ваньмыз, кыӵе ӝутскем мылкыдэн кошкиз котькудӥз куно татысь — воштонтэм эмоциос.
Тау тыныд, Енабердино, гажаса но мылкыдо пумитамед понна! 2025-тӥ арын Балтась музъемын озьы ик куноосты мыло-кыдо шулдыртыны мед кылдоз!
Следите за самым важным и интересным в Telegram-каналеТатмедиа
Без социаль челтәрләрдә: ВКонтакте, ВКонтакте, ТикТок, Ютуб, Одноклассники, Телеграм, Яндекс.Дзен
Район тормышына кагылышлы иң мөһим яңалыкларыбызны Балтаси_Хезмэт телеграм каналыбызда да укыгыз.
Нет комментариев