Карбызның нитратлы булуын ничек белергә?

Иртә сатуга чыккан карбызларны алудан тыелып тору яхшырак, чөнки аларның өлгерүен тизләтү өчен еш кына нитратлар һәм үсеш стимуляторлары кулланалар. Бу хакта «Аңлатабыз. рф» телеграм каналында сөйләделәр.

Карбызның чын тәме һәм нитратларның аз күләме сезонында басуда өлгергән карбызларда гына була. Белгечләр әйтүенчә, нитратлар — үсемлекләргә кирәкле табигый минераль ашламалар. Өлгергән карбызда нитратлар калмый диярлек, алар өлгерү процессында таралып бетә. Нитрат эзләре өлгермәгән җимешнең кабыгында гына сакланырга мөмкин.

Карбызда нитратларның күп булуы кискен агулануга, хәтта хроник авыруларга, тахикардия яисә баш авыртуы белән җәфалануга кадәр китерә.

Карбызда нитратлар бармы-юкмы икәнен өйдә тикшереп белеп була. Кайнаган җылы сулы стаканга бер кисәк карбыз йомшагын салыгыз. Әгәр су алсу төскә керсә, мондый карбызны ашамавың яхшырак. Әгәр тоныкланса, барысы да яхшы дигән сүз.

Автор: Юлия Төхбәтуллина

Чыганак: kiziltan.ru