Балтач хәрби комиссары лачындай уллар үстергән әниләргә баш иеп рәхмәт белдерде

Балтач хәрби комиссариатында районыбызның хәрби комиссары Дамир Нурмөхәммәт улы Гайнуллин махсус хәрби операция зонасында үрнәк хезмәт күрсәткән райондаш егетләребезнең әниләренә - Кече Лызидан Сергей Волковның әнисе Татьяна Волковага, Балтачтан Рамил Миңнемуллинның әнисе Фәридә Миңнемуллинага, Югары Субаштан Рафил Алексеевның әнисе Әнисә Алексеевага хәрби полк командирларының Рәхмәт хатларын тапшырды, лачындай уллар үстергән әниләргә баш иеп шәхсән үзенең рәхмәтен дә җиткерде.

Сергей белән Рамил Балтачта — чираттагы ялда, инде китәр вакытлары җитте, алар киткәч ялга Рафил кайтачак. Егетләр өчесе дә мобилизация буенча, ил чакыруын кабул итеп Ватан сагына киттеләр, инде исән-сау булып, җиңүләр белән туган якларга кайтулар насыйп булсын! Хәрби комиссары да егетләрнең кулларын кысып, батыр йөрәкле булганнарны өчен рәхмәтен белдерде.