«Дан» ордены ияләре — ГАЙНЕТДИНОВ ӘХӘТ ҖӘЛӘЛЕТДИН УЛЫ, ДМИТРИЕВ ИВАН ПАВЛОВИЧ

Автор, 3 август 2025 - 17:11

338

Бөек Җиңүнең 80 еллыгы уңаеннан районыбыздан «Дан» ордены белән бүләкләнүче райондашларыбызны барлауны дәвам итәбез

ГАЙНЕТДИНОВ ӘХӘТ ҖӘЛӘЛЕТДИН УЛЫ

III дәрәҗә «Дан» ордены кавалеры

Балтач авылында 1924 елда туган. Шушында җидееллык белем ала һәм колхоз производствосында эшли. 1942 елның августында Кызыл Армия сафларына чакырыла. Пулеметчы буларак Калинин фронты гаскәрләре составында сугыш хәрәкәтләрендә катнаша.

Курск дугасындагы дәһшәтле сугышларда була. Мценск шәһәре янындагы бәрелешләрдә авыр яралана. Савыгып чыкканнан соң Көньяк фронт составында Керчь бугазын кичеп, Кырым ярымутравына чыга һәм дошман белән йөзгә-йөз барган сугышларда икенче мәртәбә яралана.

1944 елда Ә. Гайнетдинов госпитальдән дәваланып чыга һәм Баку шәһәренә танкистлар хәзерләү курсларына укырга җибәрелә. Танкист Ә. Гайнетдинов Румынияне, Венгрияне фашистлардан азат итүдә катнаша. Авыр сугышларның берсендә снаряд эләгеп, янган танк эчендә кала, авыр җәрәхәтләр ала.

Госпитальдән чыккач, Горький шәһәренә яңа танк алырга җибәрелә. Әмма ул арада җиңү хәбәре килә. Танкны аңа икенче якка юнәлтергә туры килә — ул япон империалистларын тар-мар итүдә катнаша.

Ә.Җ. Гайнетдиновның чын батырлыкка тиң сугыш юлы югары бәяләнә, ул өч орден — Беренче дәрәҗә Ватан сугышы, Кызыл Йолдыз, Өченче дәрәҗә Сугышчан «Дан» орденнары, күпсанлы медальләр белән бүләкләнә.

Сугыштан соң Ә. Гайнетдинов Балтач һәм Арча районнарында финанс һәм дәүләт страхованиесе органнарында тырышып эшли, даими рәвештә белемен күтәрә. Гаять тыйнак һәм үз эшенә җаваплы карый белгән ветеран башкаларга һәрвакыт үрнәк була. Нәкъ менә шуның өчен ул «Почет билгесе» ордены белән бүләкләнә.

ДМИТРИЕВ ИВАН ПАВЛОВИЧ
III дәрәҗә «Дан» ордены кавалеры

Зур Лызи авылында 1921 елның 12 декабрендә туган. 1940 елда Чепья урта мәктәбен тәмамлый. 1941 елның 23 июлендә Кызыл Армия сафларына алына. Бер ел эвакуациядәге Киев артиллерия училищесында укый. 375 артиллерия полкының взвод командиры буларак сугышка керә. 1944 елның башыннан 190 укчы полкның элемтәче- разведчигы.
И. Дмитриев Украина, Белоруссия фронтлары гаскәрләре составында туган илебезне фашистлардан азат итү буенча күп сугыш операцияләрендә катнаша, ике мәртәбә авыр яралана. Венгрияне, Австрияне азат итешә. Сугышны Германиянең үз җирендә тәмамлый. Батырларча сугыша ул дошман белән. Кызыл Йолдыз, Өченче дәрәҗә Сугышчан «Дан» орденнары, «Будапештны алган өчен», «Германияне җиңгән өчен» һәм башка күп медальләр белән бүләкләнә.
1946 елда туган ягына кайта һәм район хәрби комиссариатында эшли. 1965 елдан район мәгариф бүлеге бухгалтеры була. Кайда гына эшләсә дә, һәр эштә хәрбиләрчә төгәллек, җаваплылык хас иде аңа.
Ветеран 1987 елның 16 февралендә вафат була.

(Язмадагы барлык мәгълүматлар һәм фотолар Гарифҗан Мөхәммәтшин тарафыннан төзелгән Балтач энциклопедиясеннән алынды. Бу китапка ниндидер сәбәпләр аркасында «Дан» ордены белән бүләкләнүче райондашларыбыз кермичә калган булырга мөмкин, зинһар, бу турыда редакциягә җиткерүегезне сорыйбыз).

Следите за самым важным и интересным в Telegram-каналеТатмедиа

Читайте новости Татарстана в национальном мессенджере MАХ: https://max.ru/tatmedia

Без социаль челтәрләрдә: ВКонтакте, ВКонтакте, ТикТок, Ютуб, Одноклассники, Телеграм, Яндекс.Дзен

Район тормышына кагылышлы иң мөһим яңалыкларыбызны Балтаси_Хезмэт телеграм каналыбызда да укыгыз.