Кояш баегач, чүп түгәргә ярыймы?

Кояш баегач, чүп түгәргә ярамый, диләр. Элеккедән калган бер ырым гынамы бу? Зур чүплекләргә бармасак та, кайчакта тулга чүп чиләген төнлә дә чыгарып бушатабыз бит.

–Кояш баегач, чүп ташларга ярамый дигәннән, беренчедән, элек чүплекләр еракта һәм, чыннан да, чүп оясы иде. Икенчедән, кояш баеганнан соң җиргә җеннәр тарала. Ә җеннәрнең торак урыны, азык эзли торган урыны ул – чүплек. Җеннәр белән элемтә булмасын өчен безнең горефкә шушы гадәт кереп калган, кояш баеганнан соң чүп ташлау киңәш ителми. Андый эшләрне кояш баеганчы башкару кирәк. Ә инде әгәр дә, бигрәк тә кыш көнендә кояш тиз байый, чүп ташларга туры килә икән, бу очракта бисмилләәһ әйтеп, ташларга кирәк.