Яңа Салавыч мәчетенә ай куелды (+фоторепортаж)

Кариледә яшәүче Илшат Бәдыйхов санаулы көн эчендә айны ясап өлгертте, үзе дә кую тантанасында катнашты. Әле алай гына да түгел, манарага беркетүчеләргә юнәлешен билгеләргә ярдәм итте. Торак-коммуналь хуҗалыгы кранчысы Альберт Әгълиуллин да бу изге эштә үз өлешен кертте. Авыл өлкәннәре иртә таңнан мәчет янына җыйналды, бу гасырга бер була торган тарихи мизгелне үз күзләре белән күреп калырга теләде. Төзелеп килүче мәчет белән танышкан һәркем аны эшләүче егетләрнең осталыгына сокланды. Дөрестән дә, бик кыска срокта төзелүенә карамастан, күңел җылысын салып эшләгән бу бина матурлыгы, пөхтәлеге белән рәхәтлек бирә. Яңа салаычлыларның шатлыгын уртаклашырга күрше Салавыч мәчетенә йөрүче өлкәннәр дә чыккан иде. Айны манарага куйган чакта бар халык тәкъбир әйтте, Мөдәррис абый Закиров коръән сурәләре укыды. Күзләр яшьләнде, күңелләр нечкәрде...