Җеназа намазын укыганда аның догаларын белмәсәң, нишләргә?

Сорауларга Балтач үзәк мәчете имам-хатыйбы Рамил хәзрәт Бикбаев җавап бирә.
– Мөселман илләрендә игътибар иттем – анда кешеләр азан тавышын ишеткәч кенә намазга әзерләнә башлыйлар: тәһарәт алалар, мәчеткә киләләр, мәчет намазларын укыйлар. Ә бездә камәт төшерәләр дә намазга басалар... Ничек дөресрәк була икән...

– Мәчеттә азаннан соң намазны күпмедер вакыт көтеп яисә көтмичә уку шушы мәхәллә халкының эше. Мөселман илләрендә дә кайбер мәчетләрдә азаннан соң бераз вакыт көтү кабул ителгән, ә кайбер мәчетләрдә азан әйткәч, озак көтмиләр, намазга басалар. Бу шулай ук мәхәллә кабул иткән тәртипкә нигезләнгән.

– Мөселман белән мөэмин атамалары арасындагы аерманы аңлатсагыз иде...
– Мөселман белән мөэмин атамалары синоним сүзләр, ягъни бу сүзләр арасында аерма юк. Мөселман ул шул ук мөэмин була, ә мөэмин кеше мөселман була. Кайбер галимнәребез фикеренчә, бу сүзләр арасында аз гына аерма бар, әмма бу аерма гыйльми яктан аңлатуга гына кайтып кала.

– Мәет озатканда җеназа намазын укыйбыз, әмма күпләребез аның догаларын белмибез. Мин дога белмим, дип җеназага басмыйча булмый, бу очракта нишләргә?
– Җеназа намазына килгәндә иң беренче тәһарәтле булу һәм имам артыннан ияреп дүрт мәртәбә тәкъбир әйтү кирәк. Ә догага килгәндә, һич югы «раббәнә..» догасын укырга мөмкин яисә инде үз телеңдә, каршыда ятучы мәетнең гөнаһларын ярлыкауны сорарга мөмкин.