Имам-хатыйб әттәхият укыганда бармакның нишләтергә кирәклеген әйтте

— Әттәхият укыганда кайбер кеше бармагын күтәрә, кайбер кеше күтәреп тә тормый. Бармакны күтәреп, шайтанның башына сугып алырга кирәк, диючеләр дә бар. Моның хөкеме ничек?

Сорауга Балтач үзәк мәчете имам-хатыйбы Рамил хәзрәт Бикбаев җавап бирә.

— Әттәхият укыганда, берничә хәдистә, Пәйгамбәребез (с. г. в.) бармагын күтәрде, ишарә кылды, дип килә. Шушы ишарәгә килгән вакытта, бу гамәлне кылган кешенең ишарә бармагы динебездә шәһадәт бармагы, дип атала. Кайчан да булса, шәһадәт кәлимәсен әйткән вакытта, ул намаз укыгандамы яисә башка вакыттамы, шушы бер бармак күтәрелә. Бу Аллаһ Тәгаләдән башка илаһи зат юк, Мөхәммәт Пәйгамбәребез (с. г. в.) аның илчесе, дигәнне аңлата торган ишарә булып тора. Һәм әлбәттә, Әттәхият укыганда шәһадәт кәлимәсе әйтелә һәм шул вакытта «Әшһәду әл лә илаһә» дигәндә бармак күтәрелә һәм «иллаллаһу...» дигәндә төшерелә.