Җәмил хәзрәтнең изге гамәле мактауга лаек (фото)

Инде менә ничә еллар Шода мәчетендә авылдашыбыз Җәмил Хәлирахмановның иганәчелек ярдәме белән Рамазан аенде өч мәртәбә ифтар мәҗлесләре, Корбан гаете уңаеннан балаларга бәйрәм чаралары үткәрелә. Аллаһыга шөкер, соңгы елларда мәчетләргә йөрүчеләр саны азлап булса да арта, хатын-кызлар арасында да дингә килүчеләр шактый.

Җәмил хәзрәтнең максаты авылдашларны мәчеткә тарту. Аның бу изге гамәле мактауга лаек, авыл халкы аңа бик рәхмәтле. Авыл халкы өчен эшләгән изгелекләре өчен Аллаһның рәхмәте булсын, эшләре гел уңышлы барсын, гаиләсендә иминлек булсын.

Без күрше буларак, Җәмилне бик хөрмәт итеп яшибез. Авылга кайткач, ни хәлләрегез бар күршеләр дип безгә кереп хәл белмичә киткәне юк. Аның әти-әнисе Камил абый, Рәхимә апа белән дә дус-тату күрше булып яшәдек. Өлкәннәрнең яхшы тәрбиясе балаларына да күчкән. Җәмилнең кылган изге гамәлләренә мәрхүм әти-әнисе бик сөенеп яталардыр.

Резеда Низамова,

Шода авылы