Бер телем икмәкме, әллә...

Ипи пешерүченең хыялы турында ишеткән галим аның өенә килгән. Ипи пешерүче белән очрашкач, үзенең кемлеген әйтмәгән. «Аллаһ ризалыгы өчен бер телем икмәк бирә алмассызмы?» – дип үтенгән. Ипи пешерүче: «Монда синең кебек соранып йөрүчеләр күп», – дип, ул кешене куалап чыгарган. Анда әлеге галимне танучы булган һәм ул: «Син бит әле генә үзең күрү турында хыялланган шәех Шибли хәзрәтләрен куып чыгардың», – дигән.

Икмәк пешерүче, хәзрәтне куып җитеп, аягына егылып: «Хәзрәт, сезнең ризалыгыгызны алу өчен нишлим?» – дигән. Шәех Шибли хәзрәтләре: «Иртәгә 100 кешелек табын әзерләп, мине түргә утыртсаң, риза булырмын», – дигән. Икенче көнне ипи пешерүче, 200 кешелек мул табын әзерләп, хәзрәтне түргә утыртып, кунак итә. Кунакларның берсе: «Хәзрәт, сезне бик күп белә диләр, безнең арада җәһәннәмгә керүче кеше бармы?» – дип сорый. Хәзрәт: «Әлбәттә, бар. Менә бу табынны әзерләүче кеше җәһәннәмгә керәчәктер. Кичә Аллаһ ризалыгы өчен бер телем икмәк бирмәде, бүген минем ризалыкны алыр өчен 200 кеше ашата», – дигән.

(Җәлил хәзрәт Фазлыевның «Йөз дә бер вәгазь» китабыннан)

Фото: pixabay.com