Бүген Рәгаиб кичәсе

Рәгаиб сүзе гарәп телендәге «рагәбә» сүзеннән барлыкка килә. Бу сүз нәрсәне дә булса теләргә, нәрсәне дә булса булдыру өчен көч куярга мәгънәсенә ия.

Рәгаиб кичәсе изге айлардан санала торган раҗәб аеның беренче җомга төненә туры килә. Билгеле ки, раҗәб ае фазыйләтләргә бик бай. Рәгаиб кичәсе елга бер генә килә, ә нигъмәтләре чиксез, шуңа күрә бу нигъмәтләрне җыеп өлгерергә ашыгу кирәк. Бу төнне гыйбадәттә – намазда, зикердә, Коръән укуда, тәүбә итүдә, дога кылуда уздыру инсанга бетмәс-төкәнмәс әҗер-савап китерер. Бу кичәне олы чакрымнарга чапканда хәл алу, алдыңны-артыңны күзәтү, юлым дөрес микән, дип бәя бирү өчен туктап калуга тиңләп була. Алдагы юлыбыз җил-бурансыз, тигез-такыр булсын дисәк, «хәл алу» бик мөһим.

Камил хәзрәт Сәмигуллин.