Ике гает арасында никах укыту дөресме

Әти-әниләребездә, әби-бабаларыбызда исә, бу гыйбарәгә ышану көчле, чөнки бу тәртип буыннан-буынга килгән. Әмма аның дингә, Ислам диненә катнашы бармы? Бу сорауга җавапны Татарстанның баш казые Җәлил хәзрәт Фазлыев бирде.
– Бу арада миңа көн дә бер сорау белән шалтыраталар. Ике Гает арасында никах укытырга ярыймы? Әлбәттә, ярый. Динебездә мондый тыю юк. Изге гамәлне никадәр иртәрәк кылсаң, шулкадәр хәерлерәк. Ә никах ул изге гамәл.Сүз уңаеннан, пәйгамбәребез саллалаhу галәйhи вә сәллам дә ике Гает арасында Шәввәл аенда никахлашкан.Шунысын да әйтергә кирәк: елның һәр көне ул ике Гает арасы. Ураза Гаете белән Корбан Гаете яки Корбан Гаете белән Ураза Гаете арасы. Быел Ураза гаете 15 июнь – җомга көнгә туры килә. Менә бу очракта инде гает намазы укылмыйча, никах уку дөрес гамәл булмый.