Мөселманнарга байлыкка омтылырга ярыймы?

– Хәзер мөселманнар арасында байлыкка омтылу ачык күренә. Бай булырга омтылырга кирәкме?

– Имам Әгъзәм (бөек имам Әбү Хәнифә) хәзрәтләре дәрес биргән вакытта бер бик начар киенгән шәкертен күргән дә аңа: “Әнә, паласны күтәр әле, анда акча бар, ал да киемеңне әйбәткә алыштыр”, – дигән. Тегесе “Минем кием алырлык акчам бар, әмма тәкъвалык йөзеннән шушындый начар кием киеп йөрим”, – дип җавап биргән. “Сиңа Аллаһы Тәгаләнең рәхмәте килгән икән, аның әсәре синдә күренергә тиеш”, – дигән имам Әгъзәм. Кыямәт көнне байлык өчен генә түгел, хәерчелек өчен дә җавап бирәсе бар. Ни өчен бу хәлгә төштем дип. Йә гаиләңне ачлы-туклы тоттың, син эшли ала идең, тырыша ала идең, югыйсә. Дөрес, берәр авыру булырга мөмкин, ниндидер бәла-каза килгәндер, кеше шул сәбәпле мохтаҗлыкка төшкән. Ә икенче берәү аракы эчкән йә ялкау булган, эшләмәгән. Анысы тәкъвалыкка керми. Булдыра аласың икән, матур итеп машина да ал, матур итеп өй дә сал, матур итеп киен – менә мөселманнар ничек яши дисеннәр.

 Ләйсирә Фазлыева

Акчарлак газетасы