Сәхәргә тормыйча гына тотылган Ураза дөрес буламы?

«Бу сорауны бик күп егетләр бирә: «Хәзрәт, тормасаң ярыймы?» – диләр. Әйтик, кешегә иртән эштә булырга кирәк. Сәхәрне ашаса, төн буе йокламаса, эштә эшли алмас, эштән дә куарга мөмкиннәр. Без моны аңлыйбыз. Әлбәттә, тормасаң ярый, гөнаһы юк, ураза кабул була. Ләкин тору хәерлерәк», – диде Казанның «Гаилә» мәчете имам-хатыйбы Рөстәм хәзрәт Хәйруллин сәхәргә тормыйча гына тотылган уразаның бозылмавын әйтте. (Гадел Әхмәтҗанов, "Татар информ")

Рөстәм хәзрәт сүзләренчә, шулай да, сәхәргә тору хәерлерәк санала. «Расүлебез (с.г.в.) «Сәхәр – ул сөннәтем», ди. Торып ашасагыз, бәрәкәте бик күп, ягъни ул вакытта Аллаһы Тәгалә бөтен догаларыбызны кабул итә», – диде ул.