Зиратта Корьән аятьләрен утырып тыңлау мәҗбүриме?

Зиратка баргач, мәетне гүргә иңдереп, күмгәннән соң, Корьән аятьләре, догалар укыла. Шушы вакыт эчендә озатырга килгән кешеләр, утырырга урын булмаганлыктан, азаплана-азаплана чүгәләп, озак кына утыралар. Әйткәннәре бар, күпләре, бу кайчан бетәр, инде дигән уй белән дә утырабыз, дип. Корьән аятьләре укыганда утырып тыңлау мәҗбүриме, әллә инде аяк өсте тыңласаң да ярыймы, гөнаһ булмыймы?

Сорауга Балтач үзәк мәчете имам-хатыйбы Рамил хәзрәт Бикбаев җавап бирә.

– Кешене соңгы юлга озатканда зиратка бару, кабер казышу, мәетне гүргә иңдерүдә, күмүдә катнашу, булышу һәм бигрәк тә дога кылу – бу мөселман кеше өстендәге бурыч булып тора. Әлбәттә, Коръән укыганда утырабыз, чүгәлибез, бу әдәп. Әгәр дә кешегә, бигрәк тә олы яшьтәгеләргә кыен икән, бу очракта басып торуда гөнаһ юк.