Коточкыч авариядә 3 кеше үлгән

Кичә төнлә Казанда Горький шоссесында Honda автомобилен йөрткән 21 яшьлек кыз баштан фонарь баганасына килеп бәрелгән, аннан соң бу бәрелүдән машинаны Горький шоссесы — Восстания юл чишелешенең бетон терәгенә алып аткан, дип яза «Шәһри Казан». 

Авария аркасында чит ил машинасының өч пассажиры урында ук үлгән. Автомобиль йөртүчесе медицина ярдәменнән баш тарткан.

Әлеге юл-транспорт һәлакәтеннән соң «Саксызлык аркасында ике яки аннан да күбрәк кешенең үлеменә китергән юл хәрәкәте кагыйдәләрен бозу»маддәсе буенча җинаять эше кузгатылган. 

Казан Дәүләт автоинспекциясендә сөйләүләренчә, һәлак булганнарның барысы да ир – атлар. Аларның берсенә 30 яшь, ә икенчесенә – 31 яшь. Өченче пассажирның яше билгеләнә.