«Милли моңнар» проектын ямьгә күмүче Наил әфәнде (+фото, видео)

Балтач мәдәният үзәгендә сезонны ачу уңаеннан узган концерт вакытында Яңгул авылында яшәүче, сүнмәс моң иясе Наил Заһретдиновка бүләкләр тапшырылды, "Милли моңнар" проектын тормышка ашыручы "Хезмәт" (Азьлане) редакциясенең баш мөхәррире Вакыйф Зәкиев гармунчылар бәйгесендәге уңышлы, ялкынлы чыгышлары белән котлап, аерым бүләкләде үзен.

Наил Заһретдин улы Яңгулда туып-үсеп, 1970 елда Яр Чаллыга китеп төпләнгән райондашыбыз. Ике ел элек янәдән туган авылына яшәргә кайткан. Шушы вакыт аралыгында ул районыбыздагы гармунчылар белән танышып, аралашырга да өлгергән. Ел саен әрәпә җыеп, Сабантуйларда катнашырга да вакыт һәм көч таба.

Гомере буе милли моңнар сузган гармунчы үзе кебек үзешчән осталарны туплап, татар халкының милли гореф-гадәтләрен, көйләрен саклап калу максатыннан туган ягында да саллы эшләр башкара.