Акны карадан аеру яки үз хокукларыбызны беләбезме?

Татарстан Республикасы Дәүләт алкоголь инспекциясенең Арча территориаль органы белгече Гөлназ Шакирова, “Роспотребнадзор”ның Татарстан Республикасы буенча идарәсенең Арча, Биектау, Әтнә һәм Балтач районнарындагы территориаль бүлеге хезмәткәре Фәния Сабирова һәм Балтач муниципаль районының икътисад бүлеге җитәкчесе Фәнис Галимҗанов күпфункцияле үзәкнең Балтач районындагы филиалында “Кулланучылар хокукларын яклау турында” РФ законын аңлату йөзеннән чара үткәрде. Халыкны хокукый яктан акны карадан аерырга өйрәтү төп максатка әйләнде.

Чара барышында кулланучылар базары өлкәсендә товарның сыйфатына кагылышлы мәсьәләләр каралды. Кулланучылар хокукларын яклау һәм сәүдә кагыйдәләрен үтәү өлкәсендә гамәлдәге законнарны үтәү мәсьәләләре буенча консультация үткәрелде. «Кулланучылар хокукларын яклау турында»гы Россия Федерациясе Законының төп нигезләмәләре, аерым товарлар сату кагыйдәләре аңлатылды. Сыйфатлы һәм сыйфатсыз товарлар, аларны кире кайтару һәм алыштыру тәртибе турында фикер алыштылар. Кулланучылар тарафыннан дәгъва белдерү ысулына һәм тәртибенә, низаглы хәлләрне караганда якларның хокуклары һәм бурычларына кагылышлы мәсьәләләр дә каралды. Шулай ук кулланучылар хокукларын яклау турындагы буклетлар да таратылды.

Фото: автор