Балтачта балигъ булмаган балалар эшләре буенча комиссиянең чираттагы утырышы булды.

Фәкать ике очракта гына сүз балаларның кич белән, рөхсәт ителгән сәгатьтән соң ялгызы урамда, җәмәгать урынында йөрүенә бәйле булды. Чакырылучылар арасында әти-әниләрнең парлап булуы, исерек әниләр, "сугыш чукмары" әтиләр, гомумән, балаларын онытып бәйрәм итүче, үз рәхәте өчен гомер кичерүчеләр абсолют күпчелекне тәшкил иткәнгә, бу юлы комиссия берничәсенә шактый катгый чара сайлады.

- Инде безгә кунакка йөргән кебек чиста-пөхтә киенеп килүчеләр яки эшкә йөргән кебек, бик еш "хәлебезне белешүчеләр" бар. Күрәсең, алар безнең балаларны жәлләп, кат-кат кисәтүләребезне, аз күләмдә штраф салуыбызны дөрес аңламый, шунлыктан безнең алда ике генә сайлау мөмкинлеге кала: яки өлешчә - тулысынча ата-аналык хокукыннан мәхрүм итү яки инде дәвалануга барып, туры юлга басам диючегә тагын бер һәм бердәнбер сайлау мөмкинлеге бирү, - ди әлеге комиссия җитәкчесе Наил Сабирҗанов.

Бу юлы бер әти һәм бер әнигә әнә шундый иң соңгы мөмкинлек бирелде. Кызганычка, аларның икесе дә бер авылдан.Берничә кеше кисәтелде, калганнарына штрафлар салынды.