Чисталык комиссиясенә чакырылганнар "Белмәдек" дип аклансалар да, 2000 сум штраф салынды

Әлеге комиссия утырышы "кече суд" буларак кабул ителә һәм биредә комиссия әгъзалары тарафыннан хокук бозу сәбәпле беркетмә төзелгән гражданнарга җәза бирү, гаебе булган затларга 2000 сумнан башлап штраф каралган.

Бүгенге утырышка Чепья авылыннан 3 гражданин, Әтнә һәм Шеңшеңәр авылларыннан берәр кеше чакырулы иде. Нигездә, аларга беркетмәләр "кызыл линия"дән чыгып, төзелеш алып барган һәм авыл җирлеге идарәсенән рөхсәт язуы алмаган килеш, капка төбенә төзелеш материаллары алып кайтып куйган өчен төзелгән. "Бу хакта белмәдек" дип аклансалар да, аларга карата штраф түләттерү карары кабул ителде.

Ә икенче бер шәхси хуҗалык тотучы бакчасыннан чыккан чүп-чарны, агач ботакларын елга буена илтеп ташлаганы өчен җавапка тартылды.

Шулай ук районда торак-коммуналь хуҗалык идарәсе белән чүп түгү буенча килешү төземәүче затлар да бар икәнлеге ачыкланды.

"Хуҗалыгымнан чүп чыкмый, булган барысын мунча миченә ягып барам мин", дип сәбәбен аңлатырга теләгән иргә комиссия рәисе Рамил Шакиров: "Барлык чүпне дә ягып бетереп бару мөмкин эш түгел. Чүп-чар арасында пластмасс, резина, консервант куркыныч матдәләр дә була. Димәк, сез мунчада шуларны ягып, һавага составында никадәр күләмдә зарарлы, кеше организмына куркыныч тудыра торган матдәләр булган төтен таратасыз икән әле. Бу бит үзе - экологияне пычрату, табигатькә һәм күрше-тирәдә яшәүчеләргә зыян салу дигән сүз. Әгәр экология ягыннан тикшерүче югарырак органнарга китсә, моның өчен катгый җәза бирелүе бик ихтимал. Мунча мичендә генә ягып, ул чүпне утильләштереп бетереп булмый. Иң яхшысы бу очракта - Чепья торак-коммуналь хуҗалык идарәсе белән хуҗалыктан чыккан чүпне алып китеп бару өчен төзелгән килешүгә кул кую!" - дип белдерде.