Йомшак җиһаз сыйфатсыз чыкты. Нишләргә?

«Диван алдык. Җыйган килеш иде. Бер-ике көн торды. Ял итәргә утырдым да, кулымны култыксасына куйдым. Култыкса дигәне киң, иркен. Сыйпап утыра идем, кулым ниндидер кытыршы әйбергә тиде. Диваныбыз брак, култыкса өслеге кырылган, күпергән булып чыкты. Караңгы төс булгач күренми дә. Саткан ноктага шалтыраттык, бездән әйбәт китте, үзегез керткәндә кыргансыздыр, диделәр. Барыбер алыштырдык без аны, әмма күңелдә төер калды. Ник сатучылар брак әйберләрне сатуга куеп, сатып алучыны алдый икән? Брагын әйтергә ярамый мәллә аның?»

Мондый очракларда кулланучыларга киңәш: тауарны өйгә китереп биргән вакытта тикшереп алыгыз, мөмкинчелегегез булса. Диванны җәеп карарга кирәк, кимчелекләре бармы, юкмы. Сезнең очракта кибет таләпне үтәргә тиеш иде. Сатучы сатып алучыга тиешле сыйфатлы тауар тапшырырга тиеш (ул төр тауар гадәттә кулланыла торган максатлар өчен яраклы булсын), әгәр сез сатып алган тауар кибеттә кимчелекле булып чыкса, өметсезлеккә бирелергә кирәкми.

Рәсәй Федерациясенең 1992 елның 7 февралендәге 2300-I номерлы «Кулланучылар хокукларын яклау турында»гы Законының 18 маддәсе нигезендә, товарда кимчелекләр ачыкланган очракта, әгәр алар сатучы тарафыннан билгеләнмәгән булса, кулланучы үз сайлавы буенча:

1. Шул ук маркалы тауарны алыштыруны таләп итәргә;
2. Сатып алу бәясен тиешенч яңадан исәпләү белән башка маркалы шундый ук тауарга алыштыруны таләп итәргә;
3. Сатып алу бәясен чагыштырмача киметүне таләп итегез;
4. Тауарның кимчелекләрен кичекмәстән түләүсез бетерүне яки кулланучы яки өченче зат тарафыннан аларны төзәтү чыгымнарын каплауны таләп итәргә;
5. Сату-алу килешүен үтәүдән баш тартырга һәм тауар өчен түләнгән сумманы кире кайтаруны таләп итәргә хокуклы.

Игътибар итегез: сез югарыда әйтелгән таләпләрнең берсен генә күрсәтергә хокуклы. Шул ук вакытта сез кулланучы буларак үз хокукларыгызны яклау өчен сайлаган таләпне ни өчен куярга теләвегез турында бернинди аңлатма бирергә тиеш түгел.