Кисәтергә ашыгам: Чүттән алданмый калдым...

Беркөнне в контактеда хәбәр килеп төште. “Привет, я с просьбой”, дигән. Бер урыс сүзе кыстырмас кеше русча язарга булганмыни, дидем дә мин дә “слушаю вас” дип җибәрдем. “Есть 500 р до завтра, на тел?” дип сорый бу? Уйга калдым...Бу кеше гомердә дә миннән акча сорамас кебек тоелды. Саф татарча иттереп, “фәлән кеше, бу сезме?” дип яздым. Аңа каршы “на 79065164819 билайн” дигән номер килде. Мин дә “сейчас...” дип (ике төрле мәгънәдә) җибәрдем, ул окей дип калды, ә мин фәлән кешегә шалтыратырга тотындым. Элемтә буш түгел, кем беләндер сөйләшә. Чыннан да шулаймы, әллә мошенниклыкмы бу, дип сорыйсы идем. Үзем тагын уйлыйм...ә бәлки чыннан да авыр хәлдә калгандыр, юньле кеше югыйсә... Шулай да акча күчерергә ашыкмадым... Икенче шалтыраткач алды, акча салаласың, тик минем номерга яме, ди шаяртып...Үтеп кергәннәр миңа да ди...

Кешегә нинди генә смскалар килми диләр акча сорап, моңарчы миңа берсе дә килгәне булмады, ниндидер бер телефон компаниясенең машина оттың дигән ялганыннан кала. Ә мошенниклар ничек итеп җәлеп итәсен белә, кешенең психологиясенә йогынтыны әйбәт ясыйлар – кыска һәм оста. Берәр анага баласыннан шушындыйрак смс килсә, ана йөгерә-йөгерә акча сала бит инде. Андый хәлләр булмады түгел. Сак булыйк, иптәшләр, мошенниклар кармагына каба күрмик.