Пенсионерлар бай шул…

Казан шәһәре эчке эшләр идарәсенә мөрәҗәгать иткән лаеклы ялдагы ханым үзен алдаулары турында җиткерә.

Телевизордан реклама вакытында бирелгән телефон буенча шалтыратып, ул үзенеӊ тормыш проблемаларын хәл итәр өчен экстрасенстан ярдәм алмакчы була. Шалтыраткач, телефоннан «ассистентка» сөйләшә. Ул, пенсионер хатынга бозым җибәрелүе һәм аннан котылу өчен   махсус программа үтәргә кирәклеген җиткерә. Бу программаны үтәр өчен төрле ярдәмче әйберләр, шул исәптән 20 кило шәм алу да шарт була.

Өч көн дәвамында «ассистентка» сөйләшүләр барышында олы яшьтәге хатынга аерым счетка акчалар күчерүне таләп итә. Һәм бу сеанслар өчен пенсионер апа 300 меӊ сумнан артык акча күчерә. Әмма бернинди дә үзгәреш булмагач, ул үзен төп башына утыртканнарын аӊлый һәм полициягә мөрәҗәгать итә.

Әгәр дә шундый хәлдә калсагыз яисә Сездән булмаган эш яисә товар өчен акча сорыйлар икән, бу очракта кичекмәстән 02 (кәрәзле теолефоннан 020) номерын җыярга кирәк.

Фото: pixabay.com/ru