Тормыш яхшырган саен адәм баласы бәгырьсезлегенә бара...

Воронежда хатыны белән әрләшү сәбәпле, ир коточкыч адымга барган. Бу хакта Русия Тикшерү комитетының төбәк идарәсе сайтында хәбәр ителә.

Бу хәл 18 сентябрьдә Радужный урамындагы шәхси йорт ихатасында булган. 35 яшьлек ир белән хатын арасында ызгыш чыга. Нәтиҗәдә, ир бер яшьлек кызын гараждагы автомобильнең арткы креслосына утырта, машинаның кузовына бензин сибә. Шуннан соң салонга үзе дә утырып, кулындагы канистрга ут төртә.

Баланы әнисе коткарып калырга өлгерә. Сабый беренче дәрәҗә тән пешүе алган. Аны ашыгыч рәвештә дәваханәгә алып киткәннәр.

Ир машинадан үзе чыгып котылган. Ул җинаять урыныннан качып киткән, тик 19 сентябрьдә полицейскийлар тарафыннан кулга алынган. Аңа карата кече яшьтәге кешене үтерергә омтылу мәддәсе буенча җинаять эше кузгатылган.

Фото:iz.ru