АЛАН (Тукайга ияреп)

Балтач районының нәкъ читендә
Бар, ди, бер авыл - Алан, диләр.
Урманының чиксез байлыгына
Барлык халык сокланып килгән.

Бу авылның данын зурлап тора
Гаскәр кебек баскан агачлар.
Урман матурлыгын көйгә салып,
Сайрый, ди, тургай, сандугачлар.

Әкияти авыл булган, диләр,
Нигез салган монда җиде пар.
Бер-беренең кадерләрен белеп
Гомер иткәннәр, ди, җиде яр.

Яшәр өчен урын табарга, дип,
Яңгул авылыннан менгәннәр.
Кара урманнан да курыкмыйча,
Яшел аланчыкка кергәннәр.

Җырчы кошлар сайраганын тыңлап,
Бу авылга нигез салганнар.
Җиде гаиләгә йорт җиткереп,
"Алан" дип аны атаганнар.

Алан тарткан үзенә күпләрне,
Урамнар да шактый өстәлгән.
Матурлыгын мактап, аны һәркем
"Аланым!"- дип, сөеп сөйләгән.

Урам тулы булган бала - чага,
Халкы арткан, авыл яшәргән.
Яшьләр үсеп, гаиләләр корган -
Алан үскән, Алан көчәйгән.

Алмаз Әхмәтгалиев.