Балтачта 50 килолы бәлеш пешерәчәкләр, авыз итми калма!

Балтач 2022нче елда Россиядә иң зур бәлеш пешерү рекорды белән тарихка керергә уйлый.

2018нче елда 20 килолы бәлеш Башкортстанда пешерелгән булган. Балтачта махсус мичтә 50 кило авырлыктагы борай бәлеше пешерергә уйлыйлар. Бу хакта чараны оештыручыларның берсе,  район яшьләр эшләре һәм спорт бүлеге җитәкчесе Рөстәм Заһидуллин менә нәрсәләр ди:

Чарада өч төп мәйданчык тәкъдим ителәчәк: гастрономия, күргәзмә һәм күңел ачу. Бәйрәм һәм гастрономия мәйданчыгының символы – 1 метр диаметрлы һәм 50 килолы бәлеш. Яшьләр көнендә үсеп килүче буынга милли йөзебезне, рухиятыбызны һәм гореф-гадәтләрне заманча “эчлек” белән тапшырасы килә.

Бәйрәм программасында “Коляскалар парады”, чыгарылыш сыйныф укучыларын, төрле өлкәләрдә уңыш казанган яшьләрне бүләкләү, татар эстрадасы артистлары чыгышы, көбекле дискотека бар. Бәйрәм 26 июньдә «Сабантуй» ял паркында узачак. Россиядә иң зур бәлеш пешерү рекордын теркәү 19 сәгатьтә булачак. Аннан һәркем авыз итә алачак.