Эх, күңелле балачак (фото)

Әйе, балачак - кеше гомеренең иң самими, иң гүзәл, иң күңелле мизгеле. Балачакта алган белем һәм күнекмәләр күңелләрдә гомергә уелып кала. Сәхнәдә нәни артистлар матрёшкалар, нәни чебиләр, мари һәм башка бик күп төрле биюләр башкардылар. Искиткеч матур җырлар, эчтәлекле шигъри әсәрләр укыдылар. Елаганчы көлдерерлек мизгелләр белән беррәттән уйландыргыч минутлар да булды.

Концерт ахырында Пыжмара төп гомуми белем мәктәбе директоры Раниф Әхәтов үзенең изге теләкләрен җиткерде: "Хөрмәтле авылдашлар! Бүген сез сәхнәдә үзебезнең нәни артистларның күптөрле һөнәрләрен күрдегез. Кечкенә генә балалар да ничек матур итеп нәни чебиләр биюен башкарды. Ә бит без барыбыз да шул биюне биеп үскән кешеләр. Шушы балаларның сау-сәламәт булып үсүләрен күрергә насыйп булса иде."

Концертка килгән һәркем чын мәгънәсендә ял итеп, җылы хисләр белән рәхмәт әйтеп таралышты. Кечкенә сабыйларның сәхнәгә чыгып үзләренең һөнәрләрен күрсәтүләрендә тәрбиячеләрнең фидакарь хезмәте чагыла. Авылда шундый сәләтле, өметле балалар булуы куандыра. Димәк, авылның киләчәге бар дигән сүз. Концертны мәктәп белән балалар бакчасының бердәм булып әзерләүләре аларның үзара тату, нәтиҗәле эшләүләренә бер дәлил. Аз гына вакыт эчендә лагерьда бер гаилә кебек оешып, матур ял концерты куючыларга афәрин диясе килә. Киләчәктә дә гел шулай бердәм булып, исән-сау эшләргә язсын сезгә.