Гырон быдтон — 2018: маин шумпоттоз калыкез?

Азьвыл аръёсы сямен ик сӥлё ӝукен, пӧсь табанен но турын чаен! Пӧсь шунды тылсиос улсын пыласькомы удмурт кырӟанъёсын, крезьгуръёсын, бурдъяськем мылкыдэз либатӥсь эктонъёсын! 
Удмуртъёслэсь но, оло тросгес, бигеръёс куремен, Гырон быдтонмес шулдыртыны выльысь ӧтемын яратоно Айкайёсмы! Соосын куспатыса, сцена вылын кузёяськозы Ӟаныос, Ӟаны Починкаос но Республикаысьтымы но Вятской Поляна карысь вуэм куноос. Удмурт кырӟанъёсын валче чебер тугокое биниськозы вынлыко мадьяр-венгер крезьгуръёс. Таоссэ быдэстозы Венгриысь вуэм дуно куноосмы — Миклош Дэметэрлэн эшдярез (семьязы). Удмуртлык тулкымын пыласькисьёс Миклошез ӟеч тодо ини. Мыло-кыдо егит мадьяр асьме пала нырысьсэ вуиз 1999 арын Настя нимо ӟечуонэныз (туганэныз). Вуылӥзы на эшшо кузпалъяськемзы бере 2000, 2001, 2005 аръёсы берпуметӥ кубызчиосмылэсь тодон-валанъёссэс дышетскон муген. Тыршемзылэн емышез удмуртъёсты шумпоттэ: Миклошлэн зарни киосыныз лэсьтэм кубызъёсыз удмуртъёслэсь лулгурзэс шулдырто! Айкайёслэн кубыззы но Миклошлэн кузьымез! Солэн тыршеменыз быронлэсь утемын удмурт гуртъёсысь кубызчиосмылэн Книгаосы гожтӥськытэк кылем гуръёссы, улон-вылонысьтызы чуръёссы... Та пумиськонамы вуозы соос Ижкар пыр. Соосын ӵош ик Анастасия Петрова-Дэметэрлэн сузэрыз, егит удмурт гожъяськись, общественной ужась, журналист но тодмо удмурт дизайнер Дарали Лели (тодмо удмурт поэтесса Татьяна Черновалэн нылъёсыз) но лыктыны кулэ. Крезьгурам-кырӟам сяна, куноосмы возьматыны-вузаны ваёзы удмурт крезьгуран инструментъёссэс но. Эшшо тунсыко адӟытон-вузкарон радъяськоз майданлэн палэназгес — декоративно-прикладной искусствоя Алнаш ёросысь киужъёсъя ӧнерчиослэн Центразы лэсьтэм арбериоссы: чукыри кадь удмурт мунёос, чипсонъёс-шуланъёс, кызьпу туйлэсь, пулэсь, лыослэсь, кортъёслэсь, ньӧръёслэсь пӧрам сюлэмзы пыр потэм ваньбур-узырлыкъёс. Куиськон станокенызы ужаны дышетон мастер-класс радъяськоз. Ог кылын вераса, ваньмыз луоз тунсыко. Пеляды гинэ ӵектысал на: юнме эн ыштэ каръян дырдэс, праздниклэсь котькуд минутсэ пайдаё карыны тырше: тӥ но вае возьматъяны удмурт мунёостэс, удмурт шӧмо карыса вурем выль дӥськутъёстэс, удмурт юрт котыръёсмес данъясь шатёръёсын-коркаосын тусэ усьылыны эн вунэтэ, киосады вашкала яке туала арбериос кутыса, тунсыко композициос кылдытыса... 
Гырон быдтонлэн валтӥсь «дирижёрезлэн» Ильгам Фидаелевич Гайнутдиновлэн праздникез радъясьёс азе пуктэм ужпумез тазьы чузъяськиз: «Гырон быдтон шулдыръяськон калыклэн мылкыдаз вунонтэм шулдыр мылкыдъёс кельтыны кулэ»! Озьы медло! 

Леонид Сапожников