Җитмешем аяк чала

Ильнур, 9 октябрь 2012 - 10:19

2376

Нөнәгәр авылында яшәүче, үзенең шигырьләрен газетабызга даими җибәреп торучы Рауза апа Гафиятуллина шушы көннәрдә 70 яшьлек юбилеен билгеләп үтте. Без - «Хезмәт»леләр дә аны күркәм гомер бәйрәме белән тәбрик итәбез, озын гомер, тазалык-тынычлык, иҗатының сүнмәвен-сүрелмәвен телибез.

Җитмеш яшькә аяк баскач
Агарды ла чәчләрем.
Шомырт кара чәчләремне
Инде мәңге күрмәмен.

Юкка-барга әрләнәмен,
Баш булмыйм сүзләремә.
Килгәннәрне таный алмыйм,
Ни булды, күзләремә.

Картлык явыз биләп алды
Таратып шөрепләрне.
Намазны утырып укыйм,
Яратмый бөгелгәнне.

Йөрәк әле унсигездә,
Күңелләр әллә кайда.
Картайтып булмый йөрәкне
Олыгайсак та алдан.