Рәхмәт әнкәй, барысы өчен рәхмәт!

Кадерле әниебез! Күзләрең күрми башлап, шикәр чиреннән гел интеккәч, Казандагы кызың, бертуганыбыз Рәйханә кулына күчсәң дә син һаман да безнең янәшәдә кебек, гел үтемле киңәшләреңне җиткереп торасың шикелле. Олы кызың Рәзилә белән кече балаң Сәвия дә сине ташламый, яныңа еш килә. Улларың Рамазан белән Шаһит тә инде үзләре әби-бабайлар булсалар да, әниләренә зур ярдәмчеләр. Олы улың Мөхәрләм авылда яши, ә мин Вагыйз Балтачта гомер итәм.

Әниебез 7 бала үстергән, 7се дә исән-саулар, 5се югары белемле, 2се махсус урта белем алган. Хәзер аның 16 оныгы, 20 оныкчыгы бар. "Сугыш чорында бергә эшләгән көеклеләр Зәйтүнә Хафизова, Мәрьям Гарәпшина, Хәсбиулла Садыйков, фермада терлекләр караучы Зәйнәп әби Гәрәева әле дә төшләремә керә", дип сөйли әнием. Чапшар авылы егете Шәйхетдин Сәлаховка тормышка чыга. Әтиебез 47 яшендә вафат була, тол калгач, 53 ел ялгызы балалар үстерә.

Әниебез! Бик яратабыз сине! Безне үстергәнең, кеше иткәнең өчен чиксез рәхмәтлебез. Аллаһы Тәгаләдән исәнлек-саулык, тагын да озын гомер, тыныч картлык сорыйбыз.

Барлык балалары исеменнән, Балтачта яшәүче улы, "Почет ордены" кавалеры Вагыйз Сәлахов.

Китәбез хыялны салып
Елларның агышына.
Кала авыл моңсуланып
Әремле язмышына.