«Журналлар буенча иң яхшы тираж» - Бөрбашта (+фоторепортаж)

461 хуҗалыклы Бөрбаш авыл җирлегенең почта бүлекчәсендә эшләүче Рәсилә Һадыева, Розалия Гомәрова, Эльвира Кәримуллина, Рәмзия Гафурова 2016 елның икенче яртыеллыгында «Татмедиа» журналарына 111 кешене яздырган. Бөрбаш, Алан, Бөрбаш Сәрдегәне авылларындагы һәр дүртенче йорт «Салават күпере», «Сабантуй», «Ялкын», «Чаян», «Мәгариф», «Гаилә һәм мәктәп», «Сөембикә» журналларына теләп язылган. «Татмедиа» агентлыгына кермәгән журналларны да исәпкә алганда, авылда яздырылган журналларның тиражы 168 данә тәшкил итә. Бөрбашлылар «Хезмәт», «Безнең гәҗит», «Ватаным Татарстан», «Татарстан яшьләре» газеталарын яратып укый.

«Җиңел вакыт түгел, әмма без оптимистлар, сезнең кешеләр белән аралашу осталыгына, профессионализмыгызга ышанабыз», - дип белдерде Андрей Кузьмин язылу кампаниясенә җитди карап, аның авырлыкларын намус белән җиңеп, үз бурычларын җиренә җиткереп башкарган хат ташучыларга рәхмәтләрен җиткергәндә.