Кариле балалары иң сәламәте

Һәр иртә баланы фильтр аша кабул итү белән башланып китә. Бала төркемгә килгәндә үк иртән, иң беренче итеп, барлык тәрәзәләр ачып һаваландырыла. Соңыннан, балалар белән музыкаль залда иртәнге гимнастика уздырыла. Иртәнге гимнастика баланың иртәнге йокысыннан торганнан соң сулыш, кан йөрешен, нерв системасының тонусын нормальләштерә, ашказанындагы һәм организмдагы матдәләр алмашын үзләштерергә ярдәм итә. Көндәлек гимнастика, икенче төрле әйткәндә, зарядка, баланың физик һәм уйлау-фикерләү сәләтен үстерә, шулай ук әти-әнисеннән соң кәефсез калган баланың кәефен күтәрә, шук булган балаларны дисциплинага өйрәтә, оялчан баланы активрак булырга этәрә. 4-5 яшьлек балалар өчен иртәнге гимнастика 5-6 физик күнегүдән тора. Ахырдан һәрвакыт хәрәкәтле уен белән тәмамлана. Мисал өчен: "Ап-ак куян утыра", "Песи һәм тычканнар", "Аю белән балалар".

Иртәнге аш сәламәтлек өчен бик кирәкле, чөнки балаларга иртән сөттә пешерелгән ботка бирелә. Ул бик файдалы, анда балалар организмы өчен кирәкле витаминнар күп.

Шөгыль вакытында физкультминуткалар һәм хәрәкәтле уеннар баланың сәламәтлеге өчен мөһим, ник дигәндә, алар бик тиз аралар, тизрәк уйныйсылары килә башлый, талчыгалар.

Физкультминутка һәм уеннар кирәкле вакытта уздырылса, балалар армаячак һәм үзләрен яхшы хис итәчәкләр.

Саф һавага чыгу һәм физкультура белән шөгыльләнү шулай ук балалар өчен бик мөһим. Саф һавада йөрү һәм физкультура баланың сулыш юлларын чистарта, физик яктан активлаштыра, иммунитетын күтәрә.

Урамнан кергәннән соң куллар юыла, ашаган саен авыз чайкатыла, чишенеп йокы бүлмәсенә сандалилар белән кереп караватлары янында салына. Бу шулай ук сәламәтлекне саклау, балаларга карата сакчыл караш. Йокы бүлмәсе балалар йокларга ятканчы һаваландырыла һәм ярты сәгать кала ябыла.

Йокыдан соң балалар өчен төрле сәламәтләндерү процедуралары һәм күнегүләре уздырыла: сәламәтлек сукмагыннан йөрү, һава, чыныктыру ваннасы, куллар, аяклар, башлар, күзләр һәм башка органнар өчен күнегүләр уздырыла. Балалар киенергә шулай ук һаваланган төркемгә чыгалар. Кичке аштан соң авызлар чайкатыла.

Көз һәм кыш айларында балаларга сарымсактан медальоннар ясала. Төркемгә суган һәм сарымсак туралып куела. Ата-аналар белән балаларның сәламәтлекләре турында консультацияләр уздырыла.

Балаларның сәламәтлекләрен саклау, тәрбиячеләрнең төп бурычы, шуңа күрә һәр балага индивидуаль яктан якын килергә, аның сәламәтлеге турында кайгыртырга кирәк.

Венера Габдрахманова,

Гөлсәрия Муллагалиева,

Гөлүсә Фәйзрахманова
Кариле балалар бакчасы тәрбиячеләре.

Венера Габдрахманова фотосы.